Taldekako Xilabaren finala hartu zuen iragan den larunbatean Aiherrako Denen etxea gelak eta Hazparke taldeko hirukoa izan zen saioan nagusi. Alta, Irantzu Idoate, Nahia Sasko eta Ortzi Idoatek osatutako talde honek jantzi ditu 2023ko edizioko txapelak.

Hazparke taldea osatzen duen hirukoak Muttikoakeko Irati Alcantarilla, Miren Artetxe, Ibai Lekuona eta Haize Lekuona izan zituzten aurrez-aurre finalean. Nafarroa Behereako Ahierra herriko Denen etxea gelan jokatu zen txapelketa itxi duen saioa eta, Bertsularien Lagunak elkartetik jakinarazi dutenez, «sintonia entzun orduko esku zartaz hartu zituen publikoak bertsolariak», txapelketa osoan zehar izan den giroaren eredu. Aurretik, eguerdian, bertso besta aperitifa eta bazkarian bildu ziren bertsolari eta bertsozaleak.

Gai emaile lanetan Amaia Castorene eta Xalbat Alzugaray aritu ziren eta bertsolariak aurkeztu ondorengo «lehen agur umoretsu eta jostariek giroa berotu zuten haseratik», nabarmendu dutenez.

Epaile izan ziren Ainhoa Sarasua, Iban Thikoipe eta Maialen Berrak emandako puntuaketaren ondorioz, Hazparke taldeak jantzi zituen hiru txapelak.

Antolatzaileek eskerrak ere helarazi nahi izan dituzte, txapelketan zehar jaso duten laguntza eta babesagatik: «Milesker irailean hasitako bide hontan auzolana eskaini diguzuen guzti-guztioi. Bertsoa baino gehiago gara».