Sarek ostegun honetan Gasteizen egindako prentsaurreko batean jakinarazi duenez, Juan Karlos Subijana eta Joseba Borde euskal presoak hirugarren aldiz hirugarren gradua bertan behera utzi eta espetxera itzularazi ditu Auzitegi Nazional espainiarrak.

Otsailaren 7an Basauriko Espetxe Zaintzako batzordeak eginiko proposamenari erantzunez, Subijana eta Borde presoei hirugarren gradua onartu zien Lakuak, martxoaren 21ean. Hala ere, Sarek jakinarazi du atzo, asteazkena, Madrilgo auzitegi bereziko Fiskaltzak helegitea aurkeztu zuela erabaki honen aurka eta bi presoak, egun horretan bertan, espetxera itzuli behar izan zutela «bigarren gradurako erregresioa jasanda».

«Galdetzea komeni da, zer logika dauka preso horien bilakaera ondoen ezagutzen duten espetxeetako profesionalen aurka, 400 kilometrora dauden haien helegiteak aurkezteak? Urrunetik, distantziatik erabakitzen dute presoei buruz, haietaz ezer jakin gabe eta ezer axola ez dietenean», salatu du Sarek.

Subijanak 23 urte bete ditu 28 urteko zigorretik eta aspaldi jakina da jasaten duen gaixotasuna. «Espetxeko zein Basurtuko Ospitaleko espedienteetan jasotzen den bezala, diagnostikatua du biriketako gaixotasun buxatzaile kronikoa, larritzat jotako gaixotasuna da hau; gaixotasun nefrologikoa eta desnutrizioak, historia medikuaren arabera, gaixo honen itxaropena eta bizi-kalitatea baldintzatzen ditu», azaldu du Sarek.

Joseba Borde Gaztelumendik 64 urte ditu eta 20 urte eta erdi daramatza espetxean. 2019an zigorraren hiru laurdenak bete zituen. Aurtengo ekainean, graduko lehen erregresioa jasan zuen, eta espetxera itzuli behar izan zuen. Azaroan iritsi zen bigarrena.

«Fiskaltzari berdin dio. Horiek eta beste presoek eragindako kalteak aitortzeak ez die ezertarako balio. Harentzat ez du ezertarako balio duela hamahiru urte baino gehiago ETAk bere jarduerari amaiera emateko erabakia hartu izanak. Eta hala da, ez baita justizia irizpideetan gidatzen. Justizia kasu hauetan eskuin muturreko arma politiko juridikoa bilakatu da», azpimarratu du Sarek.

Gainera, nabarmendu du «ahal dena eta ezinezkoa» egingo dutela «espetxe politika arrunta aplikatzea eragozteko eta preso horiei etxerako bidea oztopatzeko».

Urrats gehiago eskatu dizkio Sarek Lakuari

Egoera hau ikusita, urratsak ematen jarraitzeko eskatu dio Sarek Lakuari«. Aurrerapausoak ematen jarrai dezala eta espetxeetako batzordeek bere irizpide profesionalak aplikatzen jarrai dezatela, Fiskaltzaren eta espetxe zaintzako epailearen jarreren aurrean», adierazi du.

Auzitegi Nazionalak baldintzapeko edo erdi-askatasunen blokeatzen jarraitzen dieten preso horiei berriro gradu progresioak ahalbidetzea eskatu du Sarek, «espetxe ibilbidean aurrera egin dezaten» eta «dagokien eskubidea» delako.

«Inola ere ez da esaten presoak zigorrak guztiz espetxeratuak betetzera behartuta daudenik. Preso horiei debekatu ezin zaizkien beste kunplimentu-modalitate batzuk daude, espetxean betetzen direnez gain. Horregatik eskatzen dugu, beste behin, salbuespen juridiko eta penitentziarioen amaiera», nabarmendu du Sarek.