Arabako Batzar Nagusietan EH Bilduko bozeramailea den Eva Lopez de Arroyabek astearte honetan eskatu du Aiaraldea biziberritzeko Berehalako Ekintza Plana «modu integral eta berehalakoan» ezartzea. «Aiaraldeko berehalako ekintza-plana amaigabeko ekintza-plan bihurtu da, eta Aiaraldeak ezin du gehiago itxaron», adierazi du.

Batzar Nagusietan eskainitako agerraldi batean azaldu duenez, aipatutako plana 2024an amaitu behar zen, baina gaur egun oraindik ez da bete. Eta datuek erakusten dute eskualdeko egoera larria: Laudion langabezia-tasa %12,32koa da eta Amurrion %14,27koa. Gainera zenbait enpresak, haien artean, Glavista edo Guardian, itxi dute «Aiaraldeko ehunka familia langabezian geratuz».

Lopez de Arroyabek planaren hainbat helburu aipatu ditu, gaur egun inplementatu gabe daudenak, hala nola Laudio Glass Hub-eko Aiaraldea beiraren sektorean «erreferentzia hub gisa» kokatzea edo Aiaraldea Industrial Lab-en startupak «erakartzea, sortzea eta azeleratzea, bereziki industria-sektore nagusietan».

Egoera honen aurrean, EH Bilduk mozio bat defendatuko du asteazken honetan Batzar Nagusietan izango den bilkuran. Biziberritzeko Plana ezartzeko eskatuko die Aldundiari eta Lakuari, eta planaren funtsak «egingarriak diren ekimenetara» bideratzea, «ekimen horiek Aiaraldeko udalekin batera zehaztuz». 

Gainera, balorazio-txosten bat eskatuko du EH Bilduk, Aiaraldeko Berehalako Jarduketa Plana gauzatzeak eta hura ezartzeak eskualdeko ekonomian eta ongizatean izango dituen ondorioak jasotzeko.

Amaitzeko, EH Bilduk eskualdeko toki erakundeekin beharrezkoa den lankidetza azpimarratu nahi izan du, «udalak baitira ibarraren egoera sozioekonomikoa ondoen ezagutzen dutenak».