‘The Mandalorian and Grogu’ zinema-aretoetara iritsi da, ‘The Mandalorian’ telesail arrakastatsuaren jarraipen gisa. 

Jatorrizko serieak, lorpen artistiko nabarmenetatik harago, badu funtsezko elementu bat –edo, hobeto esanda, pertsonaia bat– saga honen arrakasta komertziala ulertzeko giltza bihurtu dena: Grogu. Lehen aldiz pantailan agertu zenetik, sare sozialak memez, gifez eta iruzkinez bete ziren, eta azken urteetako pertsonaia biralenetako bat bihurtu da. 

Telesaila estreinatu ondorengo hilabeteetan, Grogu-ri lotutako produktuek –pelutxeak, figurak, arropa, osagarriak eta era guztietako artikuluak– ehunka milioi dolarreko etekinak lortu zituzten mundu mailako salmentetan. 

Bere agerpenak lurrikara txiki bat eragin zuen pop kulturan. Zaleek ‘Baby Yoda’ goitizena jarri zioten, eta bere diseinuak Yoda-ren estetika klasikoaren eta efektu praktikoen nostalgiaren oihartzuna berriro piztu zuen.

Disney-en estrategia diskretu, baina kalkulatuak bere fruituak eman zituen, eta Grogu ia gauetik goizera fenomeno biral bihurtu zen.

Ez izan zalantzarik, film berrian, izaki berdearen pantailako minutuak modu esponentzialean haziko direla. Izan ere –eta ez dadila haserretu sagako zaleen komunitatea–, ‘Star Wars’-eko Indarrak galaxia orekatu dezake, baina gaur egun benetan nagusitzen dena beste indar bat da: merchandisingaren boterea.