‘Shaun ardia’ saileko film berria iritsi da. Halloween aurreko egunetan girotuta dago istorioa, Mossy Bottom-eko etxaldean. Bertan, baserritarrak, nahi gabe, artaldearen kalabaza-baratza suntsituko du. Shaunek, arazoa konpondu nahian, zientzialari ero bihurtzea erabakiko du, baina egoerak okerrera egingo du: baserritarra desagertu egingo da, eta piztia basati bat Mossinghamgo basoetan dabilela ikusiko dute.

‘Chicken Run’ eta ‘Wallace & Gromit’ lan arrakastatsuen sortzaile den Aardman Animations estudioaren lan berria da. Stop-motion teknikan aitzindaria da estudioa, eta teknika hori da, hain zuzen, filmaren oinarria.

Teknika hori animazio klasikoan oinarritzen da: marrazkiak egin beharrean, panpinak pixkanaka mugitzen dira, eta mugimendu bakoitzaren argazkia ateratzen da. «Segundo bat osatzeko, 24 fotogramekin lan egiten dugu», azaldu du Claire Rolls animazio-zuzendariak. Irudi horiek segidan proiektatuta,  badirudi panpinak mugitzen ari direla.

Filma iraileko lehen asteburuan estreinatu zen Britainia Handian, eta harrera bikaina izan zuen: ikusle gehien bildu zituzten filmen artean hirugarren postuan geratu zen, eta 1,49 milioi euroko diru-bilketa lortu zuen. Estreinatzearen arrakasta bereziki esanguratsua da Aardman estudioarentzat, aurten 50 urte bete baititu.