AEBko banku handiek hilabeteko epean utzi dute Net-Zero Banking Alliance, 2021ean sortutako eta Nazio Batuen Erakundeak babestutako elkartea. Irteera hori gorabehera, banku guztiek berretsi dute ingurumen-helburuekiko babesa. Erabaki taktiko bat dela aditzera eman dute, Alderdi Errepublikanoaren presioaren ondorioz. Hala ere, erakunde ekologistek zalantzan jarri dute horien ingurumenarekiko konpromisoa.

Deigarriena da errepublikanoek nazioarteko ekimen horren aurkako jazarpena nola antolatu duten. Merkatuaren funtzionamenduari bi muga garrantzitsu ezarri zaizkio: Alde batetik, merkantzia gisa tratatzen ditu merkantziak ez diren gauzak, hala nola langileak eta natura, eta, hortaz, horiek era suntsitzailean erabil ez ditzan, zenbait lege onartu dira; besteak beste, gutxieneko soldata, gehieneko lanaldia edo sindikatzeko eskubidea ezartzen dutenak. Bestetik, natura-baliabide jakin batzuk ustiatzea eta erabiltzea mugatzen dute eta mugak ezartzen zaizkie kutsadurari eta hondakinen tratamenduari. Neurri horiek guztiak pertsonak eta natura suntsipenetik babesteko hartu dira. Bestalde, merkatuko lehiak gero eta enpresa handiagoak sortzea eragiten du, boterea eurenganatu eta lehia suntsitzeko joera dutenak. Merkatu-botere hori murrizteko eta funtzionamendu ona zaintzeko, monopolioen aurkako legeak onartu ohi dira; esaterako, prezioak hitzartzea edo eragin-eremuak banatzea debekatzen dutenak. Badirudi errepublikanoek azken lege horiek deskarbonizazioaren aurka erabiltzea erabaki dutela: korporazioen boterea murrizteko onartutakoek orain edozein ingurumen-politika saihesteko balio dute. Hori da, hain zuzen, legearen espirituarekin bat ez datorren erabilera maltzurra egitea. Baina garai nahasi hauetan gero eta ohikoagoa bihurtzen ari da.

Ahaleginak oso bide arriskutsua zabaltzen du, ingurumen-politikak ez ezik beste edozein gizarte-politika ere desaktibatzeko. Izan ere, logika horri jarraiki, mozkinak maximizatzea ez den beste edozein gizarte edo ingurumen-helburu lehiaren murrizketatzat jo daiteke, eta, beraz, deusezta daiteke. Kapitalaren indarraren aurkako babes oro ezabatuko lukete.