Kolpea auzi politikoen judizializazioari
08/08/2020

Bruselako auzitegi batek atzera bota du Lluis Puig Generalitateko kontseilari ohiaren aurkako euroagindua. Kaleratutako ebazpenaren arabera, Estatu espainoleko Auzitegi Gorenak ez du Puig epaitzeko eskumenik. Berehala, Belgikako Fiskaltzak helegitea jartzea deliberatu du, Madrilgo aginduak bere eginez. Beraz, ebazpen horrek oraindik badu ibilbide juridikoa Belgikan. Euroagindua atzera botatzeko, auzitegiek, besteak beste, Puig ez zela parlamentaria argudiatu zuten. Defentsako abokatuek, bestalde, azpimarratu zuten auzitegiek baloratu dutela Belgikako epaileek azter dezaketela epaile espainiarra euroagindua emateko eskuduna den edo ez. Gainera, auzitegiek Puig ez dela inoiz parlamentaria izan egiaztatu dute, eta, Espainiako Konstituzioaren arabera, Gorenak kasu horretan bakarrik du eskumena. Modu horretan, auzitan da Gorenak euroagindua eman izana.

Estatu espainolak politika judizializatu du eta, ondorioz, atzoko erabaki juridikoak irakurketa politikoa ere badu. Puig kontseilaria ez zen diputatua eta orain ere ez da eurodiputatua. Beraz, Puig da aforamendurik ez duen Govern-eko kideetako errefuxiatu bakarra. Gainera, dirua bidegabe erabiltzea da bere aurkako akusazio nagusia eta hori da, hain zuzen, Europako beste ordenamendu juridikoetan baliokidea duen erbesteratu kataluniarren aurkako akusazio bakarra. Puigdemonten kasua deliberatu zuen Alemaniako auzitegiak onartutako akusazioa hori izan zen. Orduan, Madrilek euroagindua atzera botatzea erabaki zuen. Beraz, Puigen kasua zen irabazteko errazena, eta, hala ere, Estatuak galdu egin du.

Belgikako epaia aintzat hartzeko tenorea iritsi da Madrilen. Auzi politikoak auzi judizial bilakatzen dituztenek Belgikako ebazpenetik ikasgaia ateratzea zaila izango da, hala ere. Juan Carlos I.a iheslari bilakatu den honetan, gelditzen den galdera bakarra, erretorikoa bada ere, honakoa da: erbestean dauden katalanen aurkako indar eta kemen bera jarriko du Estatuak Borboia aurkitu eta epaitu ahal izateko Estatu espainolera ekartzeko?

Articles
Joseba Garmendia
20/09/2020
Juan del Barrio
20/09/2020
Iñaki Egaña
19/09/2020
Aitziber Etxeberria Aranzabal
19/09/2020
Letters
Iñigo Morete
18/09/2020
Aingeru Etxeberria | Mendillorri
18/09/2020
Joseba Otano Villanueva | Administrazioan Euskaraz Taldea
18/09/2020
Enric Vivanco Fontquerni | Barcelona
18/09/2020