Umore Azoka ostegun honetan abiatuko da Leioan Udalak antolatuta. Kaleko artearen diziplina guztiak bilduko ditu azokak aurreko edizioetan egin lez.

Berritasunekin dator XXIV. edizioa, espazio berri bat izango baitu, Alpadako hiri agertoki berritu berria. Aldapa kaleko agertokiaren diseinu berriak azalera zabalagoa, ikusmenaren hobekuntza, alboko sarrera berria eta estalitako espazioa du. «Leioak estalitako espazio berriztatua du, eta diseinu ezin hobea du hainbat emanaldi behar bezala egiteko eta ikusleen esperientzia hobetzeko, baita agertokia hainbat ekitalditara egokitzeko aukera emango duten instalazioak ezartzeko ere», nabarmendu du Iban Rodriguez alkateak. Proiektuak 525.000 eurotik gorako aurrekontua izan du.

Kaleko artearen diziplina guztiak batzen dituen azokak 41 konpainien 80 ikuskizun baino gehiago eskainiko ditu. Helburu nagusia kaleko arteen industria (antzerkia, dantza, zirkua, musika, eta abar) garatzen laguntzea da, kaleko arteen sektore horien kontsumoa, ibilbideak eta koordinazioa sustatuz, eta konpainien sustapena azpimarratuz.

Emanaldietatik zazpi familia-publikoari eskainiko dizkio, horietatik lau euskal konpainienak izanik. Hika Teatroa, La Pez, Markeliñe, Cia. Trotamundos, Cia. Artilugio, Tetês de Mules eta Cie Balancetoi & Maleta Company bezalako konpainien eskutik datoz ikuskizunak.

Gainera, kaleko arteen sektoreko 250 profesionalentzako topagunea izango da, eta hainbat jarduera garatuko dira, hala nola, elkarrizketak, bilerak edo meeting-ak, lanerako, ideiak partekatzeko eta hausnarketak egiteko guneak sortzeko, besteak beste.

Aldapako auditorium berria beste 15 espazio eszenikori gehituko zaio. Agertoki horiek, era berean, 30 kokaleku eszenikotan banatuta daude, eta Leioako udalerriaren erdigunean daude guztiak. «Horrela, joan-etorriak azkar, modu ordenatuan, jasangarrian eta seguruan egitea ahalbidetzen da», adierazi dute antolatzaileek.

Ikuskizun guztiek doako sarrera librea izango dute, Estefania de Paz Asin konpainiaren emanaldiak izan ezik, edukiera mugatua duena. Ikuskizuna hasi baino ordu erdi lehenago eta emanaldi-gunean, kasu honetan Sabino Arana Plazan, pertsona batek doako gonbidapenak banatuko ditu iristen den ordenaren arabera.

Egitarau osoa hemen.