Mar de Dios eta Natalia Suarez euskal artisten erakusketa zabalik da Londresen, Basque Artist Contemporary Exhibit programaren laugarren edizioan. Bilboko Aldama Fabre galeriak antolatu du Bizkaiko Foru Aldundiaren laguntzarekin, urriaren 4tik 31ra irekiko ditu ateak Filet Space-en.

Proiektuak euskal artea nazioartean bultzatu eta ikusaraztea du helburu, bai eta ekoizpen gune eta arte-galerien arteko lankidetza sustatzea ere, kultur eragileak lotzeko.

Basque Artisty Contemporary Exhibit (bace.project) programak aurreko edizioak New Yorken, Lisboan eta Londresen garatu ditu, aurten itzuliko den hirian.

Eugenia Griffero Fabre, Aldama Fabre Gallery-ren zuzendari eta sortzailearentzat, «euskal artisten lana beste ikuspegi batera erakusteko aukera zabaltzen da, artista horiek beren lanari buruz maila globalean egin ditzaketen galderak indartuz: nola ulertzen dituen artearen munduak bere kontzeptuak edo estetikak, zein unibertsala edo intimoa den bere mezua, nola iristen den lokala ez den beste begirada batera, testuinguru baten berezko kodeak beti berekin daramatzana».

Griffero Fabrek azpimarratu du, halaber, esperientzia honek aukera ematen diela sortzaileei «hiri ezberdinetan artearen mundua nola maneiatzen den ezagutzeko, erakunde artistiko publiko eta pribatuen bitartez: artisten espazioak, galeriak, museoa, feriak, kultur zentroak, egoitzak, etab. Azken finean, euskal artisten ekintza-eremua handitzen du».

Bi lagin

Mar de Dios eta Natalia Suarezek erakusketa honetarako berariaz sortutako bi lagin independente aurkeztuko dituzte. Mar de Dios zeramikariak tamaina handiko pieza bat eta zazpi txikiagoak erakutsiko ditu. Sail honek bere lan guztia aipatzen du, bi alderdiren inguruan: etxean egunero erabiltzen diren objektuekin lotutako lan funtzionala eta eskultura lana.

Bi proposamenek bereizita funtzionatzen duten arren, Mar de Diosek «keinu bat» egiten die Nataliaren margolanei tamaina handieneko piezaren bitartez, bere lagunaren koadro batean inspiratuta dagoena. «Oso pozik eta ilusioz beterik nago», azpimarratu du.

«Proiektu hau hemendik sortua denez, eta Eugeniak, Marek eta biok jada ezagutzen genuenez, hasieratik izan dugu denbora guztia zaintzeko, eta horrek, zalantzarik gabe, kalitatea eman dio erakusketari, prozesua askoz errazagoa izateaz gain», dio Suarezek, Londresera bost margolan eramango dituena, gehienak olio-pinturak.

Hara iritsitakoan, eta bere lanak Filet Spaceko Mar de Dios-en obrekin nola erlazionatzen diren egiaztatu ondoren, haiek guztiak erakustea ala ez erabakiko du. Haren koadroek «inposatu gabe iradokitzen dute eta atmosferako, giroko zerbait gogorarazten dute. Paisaia onirikoetan ikus daitezkeen irudiak daude. Materian bertan oinarritutako pinturak dira», azaldu du.

Sarrera doan da. Ordutegia, 18.00etatik 21.00etara.