Europako Batzordeko presidente Ursula von der Leyenek asteazken honetan jakinarazi duenez, Pfizer laborategiak esan du bost urtetik gorako haurrak koronabirusaren kontra immunizatzeko baimendu duten txertoa «abenduaren 13tik aurrera» egongo dela eskuragarri Batasuneko herrialdeentzat.

Hala iragarri du Bruselan egindako prentsaurreko batean, Europako biztanleei txertoa hartzera deitzeko egin duen agerraldian. Von der Leyenek ziurtatu duenez, Europako Batasunak nahikoa dosi baditu txertatuta dauden europar guztiei errefortzu dosi bat emateko.

Aurreko astean, Sendagaien Europako Agentziaren (EMA) oniritzia jaso zuen bost eta hamaika urte bitarteko haurrentzako Pfizer txertoak. Dosia 12 urte edo gehiagoko pertsonetan erabiltzen dena baino txikiagoa izango da (10 mikrogramo, 30 mikrogramoren ordez), baina besoaren goiko aldeko muskuluetan ere bi injekzio jarriko dira, hiru asteko aldearekin.

Batzordeak emandako datuen arabera, Europako Batasuneko helduen %76 pauta osoarekin txertatu da, baina oraindik ere oso tasa txikiak daude Bulgaria edo Errumania bezalako herrialdeetan.

Era berean, Von der Leyenek aldarrikatu du garrantzitsua dela maskararen erabilerarekin, distantzia fisikoa errespetatzearekin eta higienea ez ahaztearekin zerikusia duten prebentzio neurriak mantentzea pandemiaren aurka borrokatzen jarraitzeko funtsezko tresna gisa.

Omikron aldaerari dagokionez, Von der Leyenek onartu du «oraindik ez dakigula asko» hedatzeko gaitasunaz, baina behin eta berriz esan du «nahikoa dakigula kezkatuta egoteko».

Ildo horretatik, adierazi du bi edo hiru aste igaro beharko direla datu argiagoak izateko, eta azpimarratu du azkar jardun behar dela Europako Batasuna aldaeraren «gune» bihur ez dadin, batez ere kontaktuen jarraipena indartuz kasuak isolatzeko eta sekuentziazioan lan eginez.