Joan den azaroaren 18an, Mattin Aiestaran arkeologoa buru duen Aranzadiko taldeko Leire Malkorrak brontzezko esku bat aurkitu zuen Irulegiko Burdin Aroko herrian, Nafarroan. Bertan, orain arte aurkitu den baskonikozko testurik zaharrena dago grabatuta.

Aurkikuntza hau balio handikoa da euskararentzat, eta horrek sustatuta Bulego taldeko Tomas Lizarazuk kanta bat sortu zuen, ‘Irulegiko Esku’ izendatu zuena. Bulegotik azaldu dutenez, une honetan euren lehen birako dokumentalaren aurkezpenean murgilduta egon arren, beren ikusleekin partekatu nahi izan dute bizipen hau, eta «Tom estudioan sartu zen bere gitarrarekin, bere sentimendutik sortutako gai hau konposatzeko».

«Kanta honen sorrera albiste honek guri barruan sortu digunaren adierazle azkar bat da. Gure bihotzetatik zuen belarrietara. Bizirik egon bedi», adierazi dute taldekideek. Hala, joan den ostiralean, Lizarazuk kanta akustikoan abestu zuen Azkoitian eta taldeak YouTubera igo zuen bideoa «biral bihurtu da argitaratu eta ordu gutxira, eta erreprodukzio organiko gehien dituen singlea bihurtu da, mundu euskalduneko pertsona ospetsuekin partekatuta», jakinarazi dute.

Gaineratu dutenez, «pertsona askok» eskatu omen diete singlea streaming plataforma nagusietan ere argitaratzeko, «eta hori ostiral honetan, azaroaren 25ean, gertatuko da. Presave-a prest dago», ziurtatu dute.

Gipuzkoarrek behin baino gehiagotan lortu dute lehen postua Gaztea irratiko zerrendetan, eta 50.000 entzule inguru dituzte hilero Spotifyn. Uda honetan Bilbao BBK Live, Sonorama Ribera, EHZ, Ezcafest eta Donostia Festibala bezalako jaialdi handiak bisitatu ondoren, taldea une bikaina bizitzen ari da.