Larunbat honetan hasi eta otsailaren 13ra bitartean Kaldereroen konpartsek zartagiei eta mailuei eragingo diete Donostiako auzoetan zehar. Gainera, Parte Zaharreko eta Groseko Inudeak eta Artzainak batuko zaizkie.

Groseko Artainu konpartsa izan da lehena kaleak alaitzen. Gaur ari dira 25. urteurrena ospatzen, Groseko kultur eta jai egutegian erreferente gisa sendotuta. Aurtengo desfilean 200 pertsonak parte hartu dute. Goizeko 11.30ean ekin diote ibilbideari Txofre kaletik, eta auzoko kaleak zeharkatu dituzte Artetxe Jeneralaren kalean eguerdiko 14.00ak aldera bukatuta. Tartean ohiko parodia egin dute Katalunia plazan. Bertan, Zurriola ikastola omendu dute, euskal folklorearekin eta kulturarekin duen konpromisoagatik, eta urte hauetan guztietan Artainurekin izan duen lankidetza etengabearengatik.

Astebete beranduago, otsailaren 8an, datorren igandean, Kresalaren txanda izango da. Parte Zaharreko elkarte honek antolatutako Inude eta Artzaien konpartsa 200 pertsonaz osatuta dago. Euskal Herria kaleko egoitzatik aterako dira 12.00etan eta, ohi bezala, geldiune nagusia izango du Konstituzio plazan 13.00etan antzezpena egiteko.

50.urteurrena ospatzeko Donostia Kultura Festakek kartel berezia prestatu du, Lanzagorta Estudioak egina. Egileek omenaldia egin izan diote 1885.urtean lehen aldiz ospatu zen jaiaren jatorriari. Kartela, formatu handian, salgai egongo da Donostia Festakeko bulegoetan 3,50 eurotan.

Parte Zaharreko konpartsak Joselontxos txarangaren laguntzarekin egingo du bere ibilbidea. Joselontxos txarangak Donostia Kultura Festakekin elkarlanean, San Sebastian egunaren doinuekin bezala, Inude eta Artzaien eta Kaldereroen melodiak grabatu ditu, abesbatzarekin, danbor, zartagi eta mailuekin eta horiek guztiek gabe. Inude eta Artzaien doinuak grabatzeko Kresalako konpartsaren abesbatzaren laguntza izan du, eta Kaldereroen doinuetarako, aldiz, Konpartsa Tradizionalaren, Santa Cecilia Abesbatzaren, Laida Otaduyren eta Juan Jose Oconen laguntza izan du.

Kaldereroen konpartsak

Datozen hiru asteburuetan kaldereroen 16 konpartsek alaituko dituzte Donostiako auzoak. Asteburu honetan Lanberri izan da Txominenean, Loretope Antiguan eta Loiolatarra Kirol Elkartea Loiolan. Hilaren 6an Aldapeta Maria ikastetxearen, Zurriola Ikastolaren eta Aieteko kaldereroen txanda izango da.

Otsailaren 7an, aldiz, Parte Zaharrean Parte Zaharreko Kaldereroak, Kai Harripe Alde Zaharreko Euskara Batzordea eta Asociación Cultural Primitiva Comparsa de Caldereros de la Hungría 1884 izango dira; Amara Berrin Amarakaldek; Amaran Amarako Kaldereroak Mamur-Donosti Berri; Egian Arrano Elkartea; eta Herreran Herrera Kirol Elkartea.

Hurrengo egunean Altzako Kaldereroak arituko dira eta otsailaren 13an Jakintza Kaldereroen eta Antiguako Kaldereroen konpartsek amaiera emango diote jaiari Antiguan.

Horrez gain, Konpartsa Tradizionalak Parte Zaharreko kaleak hartuko ditu otsailaren 7ko eguna amaitzeko. 21.30etan hasiko du ibilbidea, 19 tributan banatutako 410 parte hartzailerekin. Ane Acha izango da Erregina, eta Edurne Lertxundi eta Edurne Arregi, damak. Tribuekin batera Gauerdi Txarangak eta Kresala Dantza Taldeak parte hartuko dute konpartsan.