Egiptoko Gobernuak «lorpentzat» jo du erabakia, «zaharkinak babesteko Egiptok hartutako konpromisoa» islatzen duen leku arkeologikoa delako, Ministroen Kontseiluak bere webgunean argitaratutako ohar ofizial baten arabera.

«Lorpen berri bat da, kultura-ondarea nazioarteko irizpideen arabera babesteko eta mantentzeko Egiptok duen konpromisoa islatzen duelako», dio oharrak.

Uztail hasieran, Unescoren Munduko Ondarearen Batzordeak baieztatu zuen Abu Mena hiri paleokristau santua, Atsinananako (Madagaskar) baso hezeak eta Ghadames (Libia) antzinako hiria, besteak beste, Arriskuan dauden Munduko Ondareen zerrendatik kendu dituela.

Abu Menari dagokionez, NBEren agentziak ontzat eman du 2021etik indarrean dagoen drainatze-proiektua, lurpeko uren maila nabarmen murriztea eta hauskortutako egiturak egonkortzea ahalbidetu duena.

Erromesaldi kristauen gune

Abu Mena, Alexandriako hegoaldean kokatua eta V. mendetik VII. mendera erromesaldi kristauen guneetako bat izan zena, 1979an inskribatu zen Ondarearen zerrendan, eta arriskuan dago 2001etik.

Aztarnategia erromesaldi-gune garrantzitsu baten eta izaera artistiko bereizgarria duen jatorrizko kristau monakatoaren adibide nabarmena da. Bertan, Egiptoko arkitektura-tradizioak eta Europako eta Asiako tradizio kristauak tartekatzen dira. Leku erakargarria izan zen antzinako erromes kristauentzat.