‘La huella del mal’, Manuel Rios San Martinen izen bereko bestseller-ean oinarrituta, Atapuercako aztarnategietan filmatutako lehen ikus-entzunezko ekoizpena bihurtu da, nahiz eta filmaketa Burgoseko probintziako beste leku enblematiko batzuetara zabaldu zen.

La Yecla haitzartea eta Arkeologia Esperimentaleko Zentroa (Carex) dira, besteak beste, hemendik aurrera zinearen bidez Burgos berraurkitzera gonbidatzen duen ibilbide turistikoa osatzen duten eszenatokiak.

Arkeologia Esperimentaleko Zentroa aukeratu da istorioa abiarazteko: eskolak antolatutako bisitan dagoen ikasle batek Atapuerca herriko emakume gazte baten gorpua aurkitu du, Neanderthalen lurperatze baten erreplikak egon beharko lukeen lekuan.

Aspaldiko krimen bat

Sei urte lehenago gertatutako beste erritu-krimen baten antza du gertatutakoak. Hori dela eta, epaileak lehen gertaeraz arduratu ziren bi poliziak elkartzea erabaki du ikerketa egin dezaten. Hain zuzen ere, bisitariek gertaerarekin zerikusia duten lekuak ikusiko dituzte.
Bisitariei harrera egiteko zentroa ere bada Carex, Atapuerca mendilerroko aztarnategiak bisitatu aurretik aperitibo gisa erabiltzen dena. Munduko erreferente bat da giza eboluzioaren azterketan. Atapuercako aurkikuntzak erakusten dituen Giza Eboluzioaren Museoarekin osatu behar da bisita.

Ibilbide zinematografikoak Friasera eramango du bisitaria, liburuan fikziozko Niebla izena duen herrira. Filmean Atapuerca herri errealari egiten dio erreferentzia.

Frias, Espainiako hiririk txikiena izateaz gain (Joan II.ak eman zion estatus hori XV. mendean), Burgosko lekurik ikusgarrienetakoa da, Ebro ibaiaren gainean duen Erdi Aroko zubiarekin, zintzilik dituen etxeekin eta gazteluarekin.

Eta, ondoren, Friasetik La Yecla haitzartera, Sabinares del Arlanza-La Yecla Parke Naturala bisitatzera: arrokan zizelkatutako mendi-zintzur mehar bat da, urak milioika urtetan zehar eragindako higaduraren ondorioz sortua, 100 metroko altueraraino iristen diren hormekin eta bi metro eskaseko zabalerako tarteekin.