Danimarkako dozenaka elizen kanpaiak dilin-dalan hasi ziren 11:04an, Hans Christian Andersen hil zen orduan, idazlearen lanetan inspiratutako doinuak sortuz eta ‘Andersen forever’ izeneko programaren hasiera iragarriz. Odense, bere jaioterria, izango da jarduera nagusien erdigunea.

Erakusketak, antzezlanak, instalazioak, mintegiak eta bere liburuetan planteatutako gai existentzialei buruzko eztabaidak nabarmentzen dira datorren udazkenera arte luzatuko den programa honetan.

Hans Christian Andersenen etxean, Kengo Kuma arkitekto japoniarrak diseinatu eta duela lau urte inauguratutako museo interaktiboan, irekiera ofiziala egin zen, artistari buruzko erakusketa batekin. Ondoko lorategiak ‘Flores del recuerdo’ izeneko performancearen eszenatokia izango dira.

Odenseko zinema-jaialdiak ‘La sombra’ri buruzko film labur bat estreinatuko du. Egilearen lanik ezagunenetakoa da, eta, gainera, soinu-drama bat ere estreinatuko da bertako antzokian.

2005eko ospakizunak

Programaren apaltasuna ez dator bat 2005ean bere jaiotzaren bigarren mendeurrena zela eta egindakoarekin; izan ere, kontzertuak, telebistako makroikuskizun bat eta mundu osoko «enbaxadore» famatuak aukeratu zituen egilearen izena zabaltzeko eta Danimarkara turismo gehiago erakartzeko.

Andersen urtea milioi askoko defizitarekin amaitu zen, idazlearen lanaren pisua gutxienekora murriztuz, programaren aurkako kritika masiboen artean.