Hazel Chu zinegotziak iragarri duenez, neurria irailean sar daiteke indarrean. Proposamenak Dublingo indar politiko guztien lau agintarien babesa duela azpimarratu du.

Zinegotzi ekologistak adierazi duenez, aurrekonturik ezak eta turismoaren hazkundeak hiriko zerbitzuak hondatzen ari dira, eta komun publiko gehiago eta kaleak garbitzeko langile gehiago behar dira.

«Dublingo herritarrek ondasun higiezinen gaineko tokiko zerga ordaintzen dute; beraz, etortzen diren turistek zati txiki batekin lagundu beharko lukete», adierazi du Chuk.

Gau kopuru gutxiago

Estatistiken Bulego Nagusiaren arabera, atzerriko bisitarien kopurua %6,7 igo zen 2024an, 2023an baino %6,6 milioi gehiago, baina herrialdean igarotako gau kopurua %3 gutxitu zen.
Hotelen patronalaren arabera, fakturetan balio erantsiaren gaineko %13,5eko zerga dagoenez, ez da beharrezkoa turismoaren gaineko tasa berri bat sartzea.

«Horren ondorioz, Irlanda ez da hain erakargarria helmuga gisa. Gero eta zerga gehiago ezartzen ditugu», azaldu du, kezkatuta, Micheal Lennon Skylon hoteleko zuzendariak. Bere ustez, «lehiakortasuna eta jasangarritasuna» indartu behar da sektorea hobetzeko.

Chuk gogorarazi du ekonomia nazionala «gehiegi» dagoela herrialdeko multinazionalek ordaintzen duten sozietateen gaineko zergaren menpe, eta tokiko agintariak, berriz, Gobernu zentralaren menpe daudela «dirua lortzeko». «Eta ez dugu jasotzen. Beraz, edo gehiago jasotzen dugu edo guk geuk bildu beharko dugu, gure hirietan berrinbertitzeko», azpimarratu du.