Pompidouk urriaren 22, 24 eta 25ean bakarrik irekiko ditu berriro ateak, Art Basel Parisekin batera. Arte garaikidearen nazioarteko azokak mundu osoko galeria, artista eta bildumagileak biltzen ditu, artea, musika eta ikuskizunak uztartuz hiru egunetan.

Itxiera progresiboa izan da, joan den martxoan bilduma iraunkorra tokiz aldatu zenetik, eta orain behin betiko itxiera Wolfgang Tillmans argazkilariari eskainitako azken erakusketaren agurrarekin batera gertatu da.

Bihartik aurrera, 1977tik izan duen parentesi handiena hasiko du zentroak, geldialdia beharrezkoa baita amiantoa kentzeko, fatxadak berritzeko, irisgarritasuna hobetzeko eta energia-kontsumoa %40 murrizteko.

Bost urte hauetan, museoaren jarduera Beaubourgen duen egoitza enblematikotik kanpo zabalduko da, ‘Constellation’ programari esker. Egitarau horrek Frantziako eta atzerriko beste erakunde batzuetara eramango ditu obrak eta proiektuak.

‘Constellation’

«Lehenengo gauza da ‘Constellation’, gure lanak Parisen, Frantzia osoan eta atzerrian ikusteko aukera ematen duena. ‘Maison du Centre’ bat ere jarriko dugu plazan (museoaren aurrean), berrikuntzan gertatzen dena jendeari erakusteko», azaldu du Alexandre Aumis eraikinaren segurtasunaren zuzendariak.

Gaineratu du, lanei esker, 2030ean Pompidouk 3.000 metro koadro gehiago izango duela artistentzat, ikusleentzat eta erakusketak egiteko. Gainera, Massyn (Paris kanpoaldean) Pompidou Francilien Zentroa eraikitzen ari dira: arte-fabrika bat da, 2026an irekiko dena Pompidouko eta Parisko Picasso Museoko erreserbekin eta zaharberritze-tailerrekin.