Gaztelugatxeko Monumentu Naturalaren Lankidetza Kontseiluak lehenengo bilera egin du, gunearen kudeaketan, kontserbazioan eta erabilera ordenatuan inplikatuta dauden administrazioen jarduerak koordinatzeko.

Arantza Atutxa Bizkaiko Foru Aldundiko Natura Ingurunea eta Nekazaritza Sustatzeko diputatua izan da bileraren buru, eta Nadia Nemeh Shomaly Bermeoko alkateak, Amets Jauregizar Baraiazarra Bakioko alkateak, Leandro Azkue Eusko Jaurlaritzako Arrantzako, Portuetako eta Itsasertzeko sailburuordeak eta Bizkaiko Foru Aldundiko Andoni Agirrebeitia, Ana Mari Bajo eta Asier Madarieta Juarestik ere parte hartu dute.

Kontseilua organo aholku-emailea da, eta bere helburua da erakundeen arteko lankidetza indartzea Gaztelugatxeren kudeaketan. Bere eginkizunen artean honako hauek daude, besteak beste: jarduerak koordinatzea, interes komuneko neurriak hitzartzea, espazioa kontserbatzea bermatzeko ekimenak proposatzea eta ospakizun tradizionalen jarraipena egitea.

Lehentasunezko jarduera ildoak

Lehen bileran lehentasunezko jarduera ildoak ezarri dira: ekosistemen kontserbazioa, erabilera publikoaren erregulazioa, kultura-ondarearen babesa, bisitarien fluxuaren kudeaketa eta tokiko komunitateak integratuko dituen garapen jasangarriaren sustapena.

Bizkaiko Foru Aldundiak nabarmendu du kontseiluaren eraketa udalerriekin eta Jaurlaritzarekin lankidetzan aritzeko oinarri egonkorra dela Gaztelugatxe epe luzean babesten dela bermatzeko, gune enblematikoa baita, natura, kultura eta ondarean aberastasun handikoa, eta urtero milaka bisitari erakartzen ditu.