Kultura Bendera eta Manuel Iradier elkarteek antolatu dute Afrikaldia jaialdia, Arabako hiriburuan bizi diren afrikarren 16 kolektiboren parte hartzearekin eta Gasteizko Udalaren, Eusko Jaurlaritzaren eta Vital Fundazioaren laguntzarekin.

Aurkezpen ekitaldian antolatzaileek azaldu dutenez, fikziozko sei film eta sei dokumental izango dira ikusgai 18 saiotan: 12 gaztelaniaz Florida zinema aretoetan, eta beste seiak euskarazko azpitituluekin Izaskun Arrue Kulturgunean.

Guztira, 20 bat herrialde daude ordezkatuta film horien ekoizpenean, eta sari eta aitortza ugari jaso dituzte kritikaren eta publikoaren eskutik nazioarteko jaialdi askotan.

Gainera, astean zehar, nazioarteko 12 gonbidatuk parte hartuko dute antolatutako jardueretan. Iikusleekin hitz egingo dute, besteak beste, diasporako zuzendariek, ekoizleek eta artistek.

Afrikako zinemari buruzko ikastaroa

Bestalde, Artium Museoak ere bat egingo du aurten jaialdiarekin eta Afrikako zinemari buruzko ikastaroa izango da bertan. Zinema industriako profesionalei zuzendutako jarduerak Europa jauregian egingo dira; gazteentzako eta haurrentzako tailerrak, berriz, EHUren Arabako campusean, Mendizabala Institutuan, Arte eta Lanbide Eskolan eta IDarten.

Afrikaldiaren inaugurazio ekitaldia urriaren 28an egingo da Europa jauregian, Sambou Diaby Senegalgo sustraiak dituen euskal aktoreak zuzenduta. ‘As Aventuras do Angoast’ filma ikusteko aukera ere izango da, Resem Verkron eta Marc Serena zuzendariak bertan daudela. Otsailean hil zen Souleymane Cissé Maliko zinema zuzendari ospetsuari omenaldia egingo diote.

Bikatzeko, itxiera ekitaldia azaroaren 4an egingo da, epaimahaiaren, publikoaren eta soinu banda onenaren sarien banaketarekin.