Urdaibai Biosfera Erreserbako Zerbitzutik jakinarazi dutenez, ebaluazio bisita ekainaren 3tik 5era bitartean egin zen, eta Europarcen ordezkaritzak eskualdeko hainbat gune bisitatu zituen, Turismo Jasangarriaren Europako Gutunaren Foro Iraunkorreko eragileekin eta II. zein III. faseetan atxikitako erakundeen ordezkariekin bilduz, 2020-2024 aldian garatutako ekintzak eta datozen bost urteetarako ezarritako konpromiso berriak zuzenean ezagutzeko.

Eusko Jaurlaritzako Industria, Trantsizio Energetiko eta Jasangarritasun Sailaren mendeko Urdaibai Biosfera Erreserbako Zerbitzuak eta Urremendi Landa Garapen Elkarteak koordinatu dute prozesua.

Akreditazioaren berritzeak aintzat hartzen du administrazioek, enpresek eta toki erakundeek turismo jasangarri, parte hartzaile eta inklusiboaren alde elkarrekin egindako lana. Berriztapenarekin, Urdaibaik «Europako erreferente gisa duen eginkizuna sendotu du jasangarritasunaren eta turismo kudeaketa arduratsuaren arloetan, tokiko balioa sortzen duen, ingurumen hezkuntza sustatzen duen eta herritarren zein turismo sektorearen inplikazio aktiboa bultzatzen duen garapen ereduarekiko konpromisoa berretsiz».

Europarcen Batzordearen ebaluazioa

Europarcen Batzordearen ebaluazioak «tokiko bazkide eta interesdun ugarirekin lankidetzan garatutako turismo-garapen jasangarriko prozesu jarraitua» nabarmendu du. Era berean, 2025-2029 aldirako Ekintza Plan berriaren sendotasuna goraipatu du. Plan hori Turismo Jasangarriaren Europako Gutunaren Foro Iraunkorrarekin adostu da, lurraldeko 45 erakunde publiko eta pribatu baino gehiagok osatzen duten organoarekin, alegia.

Gomendioen artean, Europarcen Batzordeak azpimarratu du garrantzitsua dela Europako gune babestuen arteko lankidetza indartzea, baita lurraldeko eragileak turismo kudeaketa jasangarrian gehiago inplikatzea ere.

Akreditazioaren banaketa ofiziala azaroaren 19an egingo da Europako Parlamentuan, Bruselan, Europako beste naturgune bereizi batzuekin batera. Gaur egun, Turismo Jasangarriaren Europako Gutunaren sareak 93 gune akreditatu biltzen ditu Europako 14 herrialdetan, baita 1.399 enpresa eta 30 bidaia agentzia ere, eta Urdaibai da gaur egun Europako egiaztapena duen Euskal Herriko naturgune babestu bakarra.