Bradfordek, Ingalaterrako Kulturaren Hiriak, aurten 3 milioi bisitari berri erakartzea espero du. Horretarako, hainbat emanaldi, ekitaldi eta erakusketa prestatu ditu, paisaiaren aniztasunean oinarrituta.

Hirigune historikoa zein ingurune naturala izango dira eszenatoki nagusiak. Udako proposamenen artean nabarmenak dira RedBall proiektua -Kurt Perschke artista estatubatuarrak sortutako munduko kaleko artelanik zaharrenetakoa- eta ‘The Railway Children’ antzezlanaren egokitzapen eszenikoa, Olivier saria jaso zuena.

Halaber, Akram Khan konpainia ospetsuak Dance United Yorkshire-rekin batera egindako ‘Memories of the future’ dantza ikuskizunaz gozatzeko aukera izango da, Bradfordeko zenbait komunitatetatik etorritako 8 eta 79 urte bitarteko 70 partaide bilduko dituena.

Erakundearen helburuen artean daude turismo kultural jasangarriagoa sustatzea, etorkizuneko belaunaldientzat ondare iraunkorra sortzea eta Bradford hiriari buruz gizarte britainiarrak duen pertzepzioa aldatzea.