100 URTE

Irungo Atsegiña erraldoi eta buruhandien konpartsak ehun urte bete ditu. San Pedro eguneko ohiko kontzertuan, Udal Musika Bandak mendeurrena omentzeko konposatu duen pieza joko du aurrenekoz.

BRONTZE AROA

Kultur ekitaldi interesgarria antolatu dute Ibarraundi museoan, Eskoriatzan. Ekainaren 28tik uztailaren 1era Brontze Aroan (k.a. VII. mendea) egindako Axtrokiko urrezko ontzien erreplikak jarriko dituzte ikusgai.

BERDINTASUNA

Berrizko Udalak «Jaixetan be berdintasunean!» kanpaina jarri du abian, eraso sexistarik gabeko jaiak bizitzea helburu informazioa, aholkularitza eta telefono bidezko arreta eskaintzen dituena.

DIZ-DIZ ELKARTEA

Mungian txupinazoa datorren asteartean botako dute, aurtengoan herriko Diz-diz emakumeen kultur elkartearen eskutik, 25 urte bete baitzituen 2020an.

GASTRONOMIA

Bilboko Errekalde auzoan ekainaren 24tik uztailaren 4ra luzatuko da egitaraua. Jai parte-hartzaileak izango dira, eta gastronomiak leku berezia izango du.

HERRI KIROLAK

Diman, uztailaren 2an, larunbata, herri kirol saio berezia dago iragarrita: Bizkaiko Lasto Jasotze Txapelketa, Bizkaiko Promozio Mailako Trontza Txapelketaren bigarren jardunaldia eta aizkora erakustaldia batuko ditu jaialdiak.