Amadou Ba Senegalgo lehen ministroak eta kargua utziko duen Macky Sall presidenteak Bassirou Diomaye Faye oposizio liderraren garaipena onartu zuten atzo, azken hori lehen itzulian nagusitasunez gailendu ondoren.

Behin-behineko emaitzen «joera» ontzat eman du Bak, eta, «konfirmazio ofizialaren zain», Faye zoriondu zuen. «Ahalguztidunari eskatzen diot beharrezko energia eta indarra eman diezazkiola goi kargu hau bere gain hartu eta gure herrialdeko buru izateko», adierazi zuen lehen ministroak.

Sallek «garailea» zoriondu zuen, «joerek irabazletzat jotzen baitute», sare sozialetan zabaldutako mezu batean, eta prozesu osoaren «garapen ona» nabarmendu zuen, gorabehera larririk gabe egin baitira hauteskundeak. «Senegalgo demokraziaren garaipena da».

Argitaratu diren aurretiazko datuek Fayeri, Lanaren, Etikaren eta Anaitasunaren aldeko Senegalgo Afrikar Abertzaleen (PASTEF) buru Osumane Sonkoren babesa duenari, botoen %57 ematen diote, Bak bildutako %31ren aurrean. Oposizioko beste hautagai batzuek, Khalifa Sallya Dakarreko alkate ohiak kasu, irabazlea zoriondu zuten halaber.

Hauteskundeak krisi politiko larri baten erdian izan ziren, oposizioaren aurkako errepresioaren eta Sallek otsailean bozketa atzeratzearen ondorioz. Horrenbestez, Konstituzionalak abenduko proposamena baliogabetu egin zuen, apirilaren hasieran egitera behartuz.