Caja Navarraren Erakunde Sortzaileen Batzordea botere betearazlerik gabeko organo aholku-emailea zen, eta bertaratutakoek dietak kobratzen zituzten bileretara joateagatik. Hala ere, behin baino gehiagotan hiru saio egin zituen egun berean, dieta hirukoitzarekin.

Horren harira, Barcinaren dimisioa eskatuz hainbat mobilizazio egin ziren, orain dela hamar urte egindako manifestazioa barne. Zeukan ardurari aurre ez egiteko «bere karguaren pribilegioen atzean ezkutatzea» leporatuta, Iruñean epaitu zezaten eskatu zuten Kontuz ustelkeria salatzeko plataformak deitutako protestan.

«Ustezko delituaren egileak Nafarroako agintariak dira, eta Nafarroan erregistratu zen. Beraz, Nafarroan ikertzea eta epaitzea nahi dugu», adierazi zien egun hartan hedabideei Kontuz plataformako presidente Javier Ayestaranek, manifestazioa hasi aurretik, Golem zinemen ondoan.

Gainera, kasu zehatz hau gizarte-murrizketetan, zerbitzu publikoen desegitean, herritar gehienen mespretxuan eta «erantzukizunak bere gain hartu behar ez izateko isiltasun-itun lotsagarrietan» ondorioztatu zela nabarmendu zuten.

Mobilizazio jendetsua hainbat gizarte-eragile, eragile politiko eta sindikalek babestu zuten, baina PSNk ez zion babesik eman.