Elkarteanek, AEko Desgaitasun Fisikoa duten Pertsonen Koordinakundeak, indarkeria matxistari aurre egiten dioten emakume desgaituei zuzendutako Eskubideen Gida bat egin du, Martxoaren 8a dela eta.

Gida horretan, kolektibo horren eskubideei, eskura dauden laguntza-zerbitzuei eta babesteko estrategiei buruzko informazioa eskaintzen da.

Elkartean koordinakundeak ohar batean azpimarratu duenez, desgaitasuna duten emakumeek «arrisku handiagoa» dute genero-indarkeriarekiko, mendekotasunagatik, baliabideetarako irisgarritasunik ezagatik eta beren errealitatea ikusezin bihurtzeagatik.

Gidak jasan ditzaketen indarkeria motak zehazten ditu, eta tresnak ematen dizkie bai emakumeei, bai haien ingurune hurbilari eta erreferentziazko profesionalei.

Dokumentua «funtsezko» hamar jardun-arlotan egituratzen da: gizarte Zerbitzuak; laguntza ekonomikoak; etxebizitza; hezkuntza; enplegua; bizitza independentea izateko laguntza; zerbitzu juridikoak; arreta psikologikoa; larrialdiko eta sexu-indarkeriako zerbitzuak. Informazio praktikoa jasotzeaz gain, gidak agerian uzten ditu emakume horiek aurre egin behar dieten desberdintasuna eta diskriminazioa.

Elkartean-ek adierazi duenez, Berdintasun Ministerioaren 2019ko Emakumeen aurkako Indarkeriari buruzko Makroinkestaren datuen arabera, desgaitasuna duten emakumeen %40,4k indarkeria jasan dute bikotean, eta desgaitasunik ez dutenen %31,9k. Indarkeria fisikoaren edo sexualaren kasuan, zifra %20,7ra igotzen da, eta %13,8ra desgaitasunik ez duten emakumeen kasuan.

Arreta eskuragarria eta prestakuntza espezifikoa

Elkarteanek azpimarratu du arreta-baliabideak guztientzat irisgarriak izan behar direla, «oztopo fisikorik, sentsorialik edo komunikaziorik gabe». Halaber, prestakuntza espezifikoa eskatu du osasun, justizia eta gizarte zerbitzuetako langileentzat, kolektibo horretan «indarkeria matxista antzeman, prebenitu eta horren aurrean jardun dezaten».

Halaber, elkarteak nabarmendu du politika publiko inklusiboek eta «sentsibilizazio sozial handiagoa» lantzen dutenek duten garrantzia, emakume horien aurkako «indarkeria eta diskriminazioa betikotzen duten aurreiritziak eta estereotipoak ezabatzeko».

Ahalik eta emakume gehienengana iristeko, Elkartean koordinakundeak komunikazio-kanpaina bat abiarazi du sare sozialetan, eta gida argitaratu du bere webgunean eta Eginaren Eginez, Elkartu eta Fekoor lurralde-elkarteen plataformetan.

Elkartearen arabera, gida hau «desgaitasuna duten emakumeentzako funtsezko baliabidea izateaz gain, erreferentziazko tresna da indarkeria matxistaren biktimei arreta eta babesa ematen lan egiten duten profesionalentzat eta erakundeentzat».