Luis Goñik adierazpenak egin ditu komunikabideen aurrean Iruñeako Aske Gunea osatu eta ordu batzuetara. Arratsaldeko 18.30ak pasata, euskaraz eta gazteleraz mintzatu da Nabarreria plazan zeuden medio guztien aurrean eta oraindik «libre» dagoela azpimarratu du.

Espainiako Gobernuak Nafarroan duen ordezkari Carmen Albak egindako adierazpenak izan ditu gogoan, zeinek segituan atxilotuko zutela Goñi agindu zuen larunbatean. Ildo horretan, herri baten «borondatea eta borrokarako griña» ez dagoela gelditzerik esan du eta horren adibide bezala jarri du Nabarreriako plazan eraikitako Aske Gunea.

«Elkartasunetik konpromezura» emandako pausua nabarmendu du eta eskerrak eman dizkie bertan bildutakoei. «Jendarteak desobedientziaren aldeko apustua egin du, ez dagoelako prest militante politikoak bahituak eraman ditzaten», esan du.

Iruñeako herri harresia sendotzeko deia luzatu du eta orain bi aste atxilotutako Xabier Sagardoi «Xapo» gogoan izan du ere.