Pernando Barrenak PPk eta PSEk ETA-ren azken agiriaren inguruan egindako adierazpenak «ulergaitzak» direla esan du Donostian egin duen agerraldian. Urrats berrien testuinguruan «alarma gorriak» pizten zaizkiela esan du, baina Sortuko bozeramailearen iritziz «zorionez, ez da hori herri honetako gehiengoaren iritzia eta jarrera».

Barrenaren iritziz, euskal jendartean Estatu espainiarraren aurrean «pixkanaka jarrera aktiboa hartzen ari da». «Estatuak gero eta argudio gutxiago ditu gure herriaren aurrean bere inboluzio estrategia garatzeko», esan du.

Ildo horretan,  ETA erakundeak iragarri duen urrats berriaren testuinguru honetan, Sortuk esfortzuak biderkatzeko garaia dela ondorioztatu du. «Herri honetan proiektu politiko guztiak egingarri izan daitezen euskal bidea osatzea dagokigu», azpimarratu du Barrenak.