Aurreko larunbatean Bilbon egindakoaren bidetik, Binakako txapeldunak izateko hautagai oso sendoak direla erakutsi dute Olaizola II.a-Urrutikoetxeak, egungo txapeldunei inolako aukerarik eman gabe irabazita.
Gabeziaren bat jartzekotan, kolpe apur bat falta dakieke, baina erasoan eta defentsan baliabiderik gehien duten bikotea direla berretsi dute Goizuetakoak eta Zaratamokoak eta hasiera-hasieratik kontrolpean izan dute partida.
Perfekziotik oso gertu, aurrelariak izan dituen aukera guztiak tantoak egiteko probestu ditu eta atzean Urrutikoetxea gaindiezina izan da egungo txapeldunentzat. Hala, berehala ireki dute zuloa markagailuan 7-2 eta 14-4 eta alperrikoak izan dira Bengoetxea VI.a eta Untoriaren ahaleginak. Gorrien nagusitasuna horrenbesterainokoa izan da, amaiera aldera, Labritera gerturatutako zenbait zalek txistu ere egin dietela, errazegi irabazi dutelako edo.
Agirre-Larunbe Promoziokoan
Bestalde, Agirre-Larunbe izango dira Gorka-Tolosaren arerioak apirilaren 2an jokatuko den Promozio mailako finalean, Tainta-Apraizi 22-15 irabazi ostean.