NAIZ
ALTSASU

Espainiar indar armatuei Euskal Herritik alde egiteko eskatu die Sortuk Altsasun

Kalera Martxak azken etapa egin du gaur; Ibarratik abiatu dira goizean eta Lakuntzara iritsi dira arratsaldean. Altsasun geldialdia egin du martxak eta han Maite Sabalza Sortuko Kontseilu Nazionaleko kideak espainiar indar armatuei Euskal Herritik alde egiteko eskatu die.

Kalera Martxa Altsasuko kaleetan barrena. (Andoni CANELLADA/ARGAZKI PRESS)
Kalera Martxa Altsasuko kaleetan barrena. (Andoni CANELLADA/ARGAZKI PRESS)

Kalera Martxaren zortzigarren eta azken etapak Ibarra eta Lakuntza lotu ditu gaur. Goizean abiatu dira Gipuzkoako herritik eta helmugara iritsi baino lehen Altsasun geldialdia egin dute. Han, Maite Sabalza Sortuko Kontseilu Nazionaleko kideak herri horretako hiru gaztek oraindik espetxean jarraitzen dutela gogoratu du, iazko urrian bi guardia zibil eta beren bikotekideekin izan zuten liskarra dela-eta.

Horrek, Sabalzak salatu duenez, «argi uzten du Estatuaren estrategia zein den: estrategia armatua da, eta gainera argi utzi du estrategia hori aurrera ateratzeko edozein eskubideren, edozein mugaren gainetik pasatzeko prest dagoela».

Nabarmendu duenez, ETAk armak utzi ditu, «baina oraindik estrategia armatuarekin jarraitzen duten batzuk badaude, salbuespeneko jokabideekin jarraitzen dutenak, eta jarraitzen dute jokatzen herri honetan azken sei urte hauetan ezer gertatu ez balitz bezala». Hori «onargaitza» dela esan du eta horregatik espainiar indar armatuei Euskal Herritik alde egiteko eskatu die.

Sortuko kideak azaldu duenez, «oso pozik» daude Kalera Martxak herriz herri jaso duen harrerarekin. «Kartzelak husteko garaia da, ez betetzekoa; herri honek ez du errepresio eta kartzelatze gehiago nahi; herri honek nahi eta merezi duena da bake eta justiziazko agertoki bat, eta hori posible izan dadin preso, iheslari eta deportatu politikorik gabeko gizarte bat». 

Lakuntzan ere harrera beroa egin diote martxari. Zazpiak aldera iritsi dira plazara, eta Hatortxuren hasiera ekitaldiarekin bat egin dute.