Metroaren pasantearen bultzatzaileek lanak aste honetan hasiko direla iragarri dute. Hori dela eta, Satorralaia mugimenduak hainbat mobilizazio deitu ditu aste honetarako eta «jende guztiari» dei egiten diote «inposatze-egitasmo honi ahalik eta herri-mobilizazio indartsuenarekin erantzuteko».

Bihar, azaroak 14, elkarretaratzea eginen dute Merkataritza Ganberan 17:45ean. Bihar egingo dituzte-eta obraren zuzendariek eta Jaurlaritzaren teknikariek egitasmo honek Antiguan zuzenean kalteturiko etxebizitzetako bizilagunei azalpen teknikoak emateko azken bilera, leku berean, 18:00etan.

Ostegunean, aldiz, obrak gelditzeko aldarrikapen gunea osatuko dute Zarautz etorbideko eremu kaltetuan eta bertan prentsaurrekoa emanen dute. Gunea 10:00etatik aurrera egonen da kokatua eta prentsaurrekoa 11:30ean izanen da. Baina mobilizazioak ez dira soilik goizean izanen. Hala, 18:30ean auto-karabana bat abiatuko da Amarako Pio XII Plazatik eta aldi berean hiri-erdialdeko kaleetan informazioa banatuko da.

Aldarrikapen eta protesta asteari larunbatean jarriko zaio txapela, Antiguatik Alderdi Ederrera egindo den manifestazioarekin. 17:00etan abiatuko dira.