Kaliforniarrek euren Estatuko Konstituzioak abortatzeko eskubidea esplizituki babestu behar duen edo ez bozkatuko dute. Galdera hori azarorako aurreikusita dauden hauteskundetan sartzea erabaki du Estatuko Asanbladak

Ameriketako Estatu Batuetako Auzitegi Gorenak ‘Roe v. Wade’ (1973) epaia indargabetu zuen joan den ostiralean, herrialdean abortatzeko eskubidea babesten zuena. Abortatzea legezkoa da Kaliforniako jurisprudentziaren babespean, baina Alderdi Demokratak eskubide hori babestu nahi izan du konstituzio estatusa emanez.

Mugimendu horrek Vermont Estatuak (ipar-ekialdea) egindakoari jarraitzen dio, aitzindaria izan baitzen horrelako konstituzio emendakin bat onartzen.

Haurdunaldia eteteari buruzko eztabaida azaroko hauteskundeetara arte iritsi da. Egun horretan Kaliforniako gobernadorea, estatu horretako hirietako alkateak eta Estatu Batuetako Kongresuko kideak berrituko dituzte.

Orain arte, legegile demokratek hamasei lege proiektu aurkeztu dituzte azken hilabeteetan, Gavin Newsom gobernadorearen beraren hitzetan, ugalketa eskubideen «Estatu santutegi» bihurtzeko.

Newsomek ostiralean sinatu zuen lege proiektu horietako bat, eta abortua zigortuta dagoen estatuetatik bidaiatzen duten pazienteei zerbitzuak emateagatik erantzukizun zibileko epaiketetara eraman diren ugalketa osasuneko klinikak babesteko konpromisoa hartu zuen.

Era berean, 125 milioi dolarreko partida iragarri zuen abortuaren aurkako estatuetatik datozen haurdunei iristea errazteko, eta onartu zuen zentro batzuek prozesu osoa ordaindu ahal izatea, emakumeei dirurik eskatu gabe.

Gorenaren behin betiko erabakia argitaratu zenean, Kalifornia, Washington eta Oregon –AEBko mendebaldeko kostaldea osatzen duten hiru estatuek– abortatzeko eskubidea bermatzeko konpromisoa berretsi zuten, ‘West Coast offensive’ gisa kalifikatu zituzten ekintza batzuen bidez.