MyMuse enpresak, Anushka eta Sahil Gupta bikoteek sortutakoa, «jostailu sexualak» deiturikoen erabilerarekin lotutako tabuak aldatu nahi ditu, eta haien produktuak hasiberrientzat hain beldurgarriak ez izaten saiatzen dira.

«Lotsa, errua eta beldurra erabilera intimorako objektu bat erostearekin lotuta daude», azaldu du Anushkak. Gero eta enpresa gehiago ari dira sexu-askapenaren olatuan nabigatzen.

Indiako hiri handietan lan egiten duten gazteek munduko joerak ezagutzen dituzte, Instragram bezalako sare sozialetan eroso sentitzen dira, eta Tinder, Bumble edo Hinge bezalako hitzordu-plataformetara ohituta daude.

Inbertitzaileek jostailu sexualen aldeko apustua egin dute orain, ia berria den merkatua 1.400 milioi biztanleko herrialde honetan.

Guptatarrek saltzen dituzten bibragailuak eta beste jostailu sexualak pakete diskretuetan bidaltzen dituzte etxeetara iazko covid-19aren pandemiak eragindako konfinamendutik geroztik.

Ordutik dozena bat kontratazio egin dituzten eta, gaur egun, herrialdeko ia 200 hiritan entregatzen dituzte euren produktuak.

Sare sozialetan kanpaina eginez, sexualitateari buruzko informazio zuzena ematen saiatzen dira, Bollywoodeko zineman zabaldutako klixeetatik urrun.

«Misoginia eta sexismo hori guztia kendu nahi diogu, eta gauza eder, natural eta unibertsal bihurtu», azaldu du Anushka enpresa-buruak.

Sexu-heziketaren aurkako jarrera

Gizmoswalak, beste enpresa berri batek, Bombay hirian kit sado-masokistak entregatzeko aukera eskaintzen du, eta LoveTreatsek, berriz, lentzeria sentsual eta urrutian kontrolatutako bibragailuak eskaintzen ditu.

Baina hazten ari diren enpresa horiek kritika ugariri egin behar diete aurre Indiako gizartean, non ezkontza konponduak arau diren oraindik ere.

«India bat baino gehiago dago sexualitateaz ari garenean. India batek aldaketak egin baditu ere, beste batek poliki-poliki eboluzionatzen du eta oraindik 10 edo 20 urteko atzerapena du», azaldu du Jaya Aiyappa sexu-hezkuntzan adituak.

Badaude pentsamolde atzerakoia duten talde batzuk haien ustez indioen balioekin talka egiten duten jarrerak erakusten dituzten bikoteak erasotzen dituztenak.

Era berean, politikariei eta poliziei leporatzen zaie hoteletara eta gaueko klubetara indarrez sartzeaz, jendaurrean jarrera maitekorrak dituzten, alkohola kontsumitzen duten edo «modu lizunean» janzten diren gazteei erasotzeko.

Iaz, aduanak bibragailuen eta kontsolagailuen kargamentu bat konfiskatu zuen, konfinamendu garaian horien eskaerak izugarri handitu baitziren. Indiako legediak «giza gorputzaren zatiak diruditen jostailuak» inportatzea debekatzen du.

Sexualitateari buruzko eztabaidarik ezak desinformazioa eta tratu txarrak ekar ditzake, Jaya Aiyappak dioenez. Gaineratu du eskolan sexu-hezkuntza programatzeko ahaleginek kontrako ahots askorekin egiten dutela topo.

Anushka Guptak aldaketa beharraz atzerritik itzultzean ohartu zen, Indian antisorgailuak eta lubrifikatzaileak bezain funtsezkoak diren sexu-osasuneko produktuak aurkitu ezin izan zituenean.

«Egoera kaotikoa da», adierazi du, Indiako emakumeek sexualitatearen ezjakintasunean jarraitzen dutela azpimarratuz. «Emakume bati ez zaio sexuaz hitz egiten ezkonduta egon aurretik», dio, «eta ezkondu bezain laster galdetzen zaio: noizko haurra?».