«Ezin zen hobeto programatu. AEBetarako lege eder eta handia onartzeko zein egun hoberik, independentzia-eguna baino?». Mike Johnson Ordezkarien Ganberako burua pozik zegoen, Donald Trumpen agindua betetzeko beharrezko botoak zakuan zituela jakitun. Gaur bertan sinatuko du presidenteak Etxe Zurira eraman duen agendaren giltzarria izango den araua.

24 ordu lehenago, hogei baino gehiago ziren espantuka ari ziren errepublikanoak. Maiatzean Senatura bidali zuten legea eraldatuta zetorrela salatzen zuten. Aurkari gutxi batzuk, teorikoki moderatuak, legeak beren barrutietara dakarren hondamendiaz jakitun: eremu urrunetako ospitaleetara eta behartsuen medikuntza-arretara dakarren kolpeaz jakitun. Ez da alderdia eta liderra herritarren aurretik jartzen dituzten lehen aldia, goiz ala berandu, lerro-lerro dira Trumpen esana betetzeko.

Kezka handiagoa Freedom Caucus-eko eskuin muturretik zetorren, defizitaren belatzek ez baitute begi onez ikusi hiru bilioi dolar baino gehiagoko zorpetzea dakarren araua. Medicaid-en eta energia berriztagarrietan mozketak eginda ere, milioidunei zergak kentzea eta immigrazioaren aurkako politikak egitea garestia da.

DEMOKRATEN PROTESTA

Alexandria Ocasio-Cortez kongresukide progresistak salatu zuen Behe-Ganberan legearen hipokrisia. Tabernaria izana da, eta AEBetako leku gehienetan zerbitzariei ez diete gutxieneko soldata ere ordaindu behar, eskupekoekin osatzen delako. Eskupekoei zerga kentzeko agindu populista dakar Trumpek legean, kanpainan agindu gisa.

«Eskupekoekin bizi izan den bakanetakoa naiz hemen, eta utzidazue iruzurra salatzen. Batetik, 25.000 dolarrera arte kentzen da zerga. Eta trukean, zure umeei jaten emateko laguntza galdu, osasun-eskubidea galdu, haurrari fardelik ezin ipini. Zeren truke? Deabruarekin ituna da. Zerga nazionala hauspotzen du, gure ekonomia militarizatzen du, osasun-eskubidea eta duintasuna kentzen dizkie herritarrei. Zertarako? Elon Muski eta milioidunei, lukurariei, zergak kentzeko», esan zuen.

Asteazken goizean saioari ekin ziotenetik, ostegunera arteko gau osoa eman zuen Johnson-ek errepublikano errebeldeak limurtzen. Hain dute txikia gehiengoa, ezen 435 kideko Ganberan hiru boto baino ezin baitituzte galdu.

Atzo goizean lana egintzat jo zuen. Baina orduan, Hakeem Jeffries demokraten buruak trikimailu baten bidez hitza hartu zuen eta diskurtso luze bati ekin zion. Zortzi orduz egon zen berbetan, Ganberako marka hautsiz eta bozketa atzeratuz. Demokratek «presio egiten jarraituko» zutela adierazi zuen, Martin Luther Kingen hitzak errepikatuz. «Presio gaixoen alde, presio ahulen alde, presio demokraziaren alde, garaipena irabazi arte», adierazi zuen.

Baina atzo, porrotaren eguna izan zuten. Johnsonek, Trump «lider ausart eta adoretsuari» eskerrak emanda, bozkatzeko deia egin zuen Jeffriesek amaitu bezain laster. Bi errepublikanok bozkatu zuten aurka, demokratekin batera.