Oraindik hilabete asko falta diren arren, eta harrigarria badirudi ere, 2026ko Oscar sarietarako lehen apustuak zabaltzen hasi dira jada AEBtako zenbait webgune eta komunikabideen artean. 

Hasteko, deigarria eta pozgarria da zerrendetan lau emakume zuzendari agertzea: Celine Songek, ‘Past Lives’ film zoragarriaren egilea, ‘Materialists’ izeneko lana estreinatuko du. Komedia erromantiko bat izango da, Pedro Pascal, Dakota Johnson eta Chris Evans protagonista dituena. Abuztuaren 14an iritsiko da Hego Euskal Herriko aretoetara. 

‘Nomadland’ film berezia zuzendu zuen Chloé Zhao-ren izena ere ageri da: ‘Hamnet’ drama historikoa zuzendu du, Agnes (Jessie Buckley) eta William Shakespeare (Paul Mescal) senar-emazteen ingurukoa. 

Netflixek, berriz, Kathryn Bigelow-en lan berria ekoitzi du: ‘A House of Dynamite’ Rebecca Ferguson eta Idris Elba protagonista dituen filma. 

‘Die, My Love’ aldiz, Lynne Ramsay zinegilearen proposamen berria izango da. Jennifer Lawrence eta Robert Pattinson dira protagonistak, eta Martin Scorsese da ekoizlea. 

Zerrendetan ageri diren gainerako lanak hauek dira, besteak beste: ’One Battle After Another’ (Paul Thomas Anderson), ‘Marty Supreme’ (Joshua Safdie), ‘Sentimental Value’ (Joachim Trier), ‘After the Hunt’ (Luca Guadagnino), ‘Sinners’ (Ryan Coogler) eta ‘Un simple acciden’ (Jafar Panahi ).