Larunbatean, abuztuaren 9an, mendi martxa bat antolatu zuen Urbasa-Andia Bizirik plataformak, Azantzan (Goñi) eta Sarbilen (Etxauri) gaur egun jendaurreko erakusketa fasean dagoen poligono eolikoaren eragina jasango lukeen eremua ezagutarazteko eta proiektuaren eragina salatzeko.

Plataformak jakinarazi duenaren arabera, tenperatura beroak gorabehera, 300 pertsona inguru elkartu ziren larunbatean mobilizaziorako, 6 kilometroko ibilbidean parte hartzeko, paraje natural batean. Gainera, ibilbidea musikarekin eta partekatutako hamaiketakoarekin bukatu zuten Azanza herrian.

Ibilbidean zehar, eta hainbat adituren eskutik, proiektuaren paisaiari, ingurumenari eta bizimoduei eragin ditzakeen «kalte larriak» azaldu zituzten, baita proiektuaren «gabeziak» ere.

Goñi Ibarreko Udalaren, Sustrai Eraikuntza fundazioaren eta inguruko bizilagunen laguntzarekin, deialdia «arrakastatsua» izan da antolatzaileentzat. «Landa-ingurunean horrelako proiektu espekulatiboen inguruan dagoen kezka eta gaitzespen soziala erakutsi du», azaldu dute. «Haien ondare preziatuena, natura-ondarea, suntsitzen duten eta etorkizuneko garapena hipotekatzen duten proiektuak», gaineratu dute.