Tindoufeko (Aljeria) errefuxiatuen kanpalekuetatik atera eta Iruñean zein inguruko herrietan ari dira uda pasatzen hogeita hamar bat haur saharar, ANAS ANAS Saharako Lagunen eta Lagunen Nafarroako Elkarteak bultzatutako Oporrak Bakean proiektuaren barruan. Ostiral goiz honetan Iruñeko udaletxea bistatu dute harrera familiekin eta elkarteetako ordezkariekin batera.

Iruñeko alkate Joseba Asironek, Udalbatzako kideekin batera, ongietorria eman die guztiei, basamortuko berotik urrun harrera familietan udako hilabete atseginak pasa ditzaten espero duela adierazi die. Izan ere, garai honetan Tindoufeko kanpamentuak 55 gradura iristen dira. Gainera, udako egonaldiak errefuxiatuen kanpamentuko eguneroko errutina apurtzeko aukera ematen die, aisialdiko egun batzuk eskainiz. Bertan geratu beharrean, programa honen onurak haurren egoera fisikoa hobetzean datza, elikadura anitzagoa jasoz eta osasuna zainduz. Izan ere, Iruñean egiten ari diren egonaldiko hogei bat parte hartzaile gaixo dauden haurrak dira, eta berariazko arreta medikua behar dute. Horregatik, familietan ostatu hartu beharrean, Orkoiengo ikastetxe publikoan bizi dira, herriko Udalak lagata, hezitzaile espezializatuen begiradapean.

Harrera-familiek funtsezko zeregina dute Oporrak Bakean programaren arrakastan. Honaino bidaiatu duten ehun adingabeetatik 80 familietan daude. Horietatik 77 aurreko aldietan etorri dira eta 23 lehen aldiz, Carol Garcia Pellejeros Oporrak Bakean programaren arduradunak azaldu duen bezala. Hamdi Aomar Ahmed Fronte Polisarioak Nafarroan duen ordezkaria ere bertan izan da.

Harrera familiek eta begiraleek lagunduta, adingabeek udalbatzako kideak agurtu dituzte eta opari bana jaso dute. Zehazki, motxila bat, 2025eko sanferminetako kartela zeraman kikara serigrafiatu bat, margoak, koloreztatzeko erraldoien eta buruhandien marrazkiak eta kristalezko botila bat eman dizkiete. Bestalde, txikiek eta haien familiek hondarrez egindako koadro bat eman diote alkateari. Bertan, pertsona bat eta gamelu bat ageri dira basamortuaren erdian, beren lurraren oroimenez.