Xabier Manterola Hendaia Biltzen taldeko hautetsia eta Iparretarrak erakundeko militante ohia hil egin da, ‘Mediabask’ agerkariak berri eman duenez. Larunbatean gertatu zen heriotza.

Konpromisoa, politikoa, kulturala nahiz soziala, izan zen bere bizitzaren haria. Iparretarrak erakunde armatuko kide izateagatik bi espetxe zigor jaso zituen, baita GALen atentatu bat ere. 1985eko otsailean izan zen, bere autora sartzera zihoala leherketa bat jasan zuenean. Ibilgailuaren leihoak eta eguzki-sabaia ondo itxita ez zeudenez, onik atera zen eraso hartatik Manterola, horri esker uhin hedakorra zabaldu egin baitzen.

1970eko hamarkadan Herri Taldeko kide izan zen, eta hil den arte tokiko politikan buru-belarri murgilduta egon da. Hendaia Biltzeneko kide gisa, Udal Kontseiluko kide izan zen 2020an, hasieran Kotte Ecenarroren gehiengoarekin eta gero oposizioan, bere taldea erretiratu zenean. «Gizon sinesbera, konprometitua, aktibista nekaezina eta lagun ona zen», gogoratu du Iker Elizalde zinegotzi eta Hendaia Biltzeneko kideak ‘Mediabask’-en.

Azken urteetan, pobreziaren aurkako borrokan jardun zuen Manterolak. Zinegotzi gisa, arazo horri heltzeko ardura duen batzordeko kide zen. «Berak eta Daniel Bernardek aparteko lana egin zuten», nabarmendu du Elizaldek. On Egin elkartea 2022an sortu zen etxerik gabeko pertsonei janari beroak emateko, eta Gurutze Gorriaren laguntza taldearekin lankidetzan aritu zen. «Altruista eta gainerakoekin adeitsua, Xabier Hendaiako Gurutze Gorriaren laguntza taldeko zutabea izan zen», adierazi du GKEak bere sare sozialetan.

Kultura arloan, dantzaria eta txistularia izan zen eta Hendaian euskal kultura sustatzen lagundu zuen, besteak beste, Akelarre elkartearen bitartez. Txontxongilo Egunak euskarazko jaialdiaren sortzailea ere izan zen.

Uda Leku elkarteko kide ere izan zen Manterola.