Hasiera eman zaie Notting Hilleko Inauteriei; diamantezko ezteiak ospatzen dituen asteburu honetan, txikienak izan dira Londreseko auzoko kaleak zeharkatzen lehenak.

Musika, kolore asko eta karibear erritmoen soinura egindako dantzekin ekin zaio Notting Hilleko Inauteri ikoniko eta aldarrikatzailearen 60. urteurrenari, urtero milioika pertsona erakartzen dituen jaiari.

Ibilbideak Londreseko mendebaldeko auzo honen bihotza zeharkatu du, eta auzoko zein ikustera gerturatutako jendeak oihu artean babestu du ingurua hartu duen musika.

Etxeko txikienen desfilearen aurretik, komunitateak egunsenti aurreko ‘J'ouvert’ errituala ospatu du; parte-hartzaileak margoz eta hautsez estaltzen dira kaleko erritu honetan, elementu historikoak sinbolizatzeko eta gizarte-inhibizioetatik askatzeko.

1966ko lehen desfilea, jai edo ikuskizun bat izatetik urrun, Karibeko komunitatearen behar bat izan zen, banatuta zeuden guztiak elkartzeko asmoz. Orduz geroztik, Inauteria Karibeko kulturaren eta Windrush belaunaldiaren ospakizun handienetako bat bihurtu arte hazten joan da, Notting Hilleko kaleak hartuz.

Jende kopuru handia dela eta, Londreseko Poliziak iragarri du 7.000 agente baino gehiago bertaratuko direla, une oro ospakizunaren segurtasuna bermatzeko eta indarkeriak zein gertakariek jaia ez zapuzteko.

Iaz, agintariek 500 atxiloketa baino gehiago egin zituzten, batez ere drogarekin, sexu-erasoekin, armak edukitzearekin eta indarkeriazko ekintzekin lotutako delituengatik.

Ospakizunak igande osoan zehar jarraituko du hainbat jairekin, eta astelehenean helduek lekukoa hartuko dute Notting Hilleko kaleetan zehar ospakizunaren jarraitzeko, musika isildu arte.