Irribarria-Rezusta bikotea denen ahotan ostiralean Zestoan hasiko den Binakakoan
Atzoko final bikaina asimilatzeko astirik gabe, Bilbon aurkeztu dute heldu den ostiralean Zestoan hasiko den Binakako Txapelketa, Lau eta Erdiko txapeldun berria, Oinatz Bengoetxea, bertan izan gabe.
Leitzakoak txapelketako berrikuntzetako bat izango du atzelari, Mikel Larunbe bizkaitarra. Asperen aldetik, berriz, Danel Elezkano izango da aurpegi berria eta Jose Javier Zabaleta izango du atzean lagun. Esperotako izenak izan dira beste guztiak eta Asegarceren aldetik Olaizola II.a-Untoria, Urrutikoetxea-Beroiz eta Artola-Albisu izango dira beste bikoteak. Alegiakoak ezin izan du ziurtatu ostiralean Zestoan izango denik, bihar egingo du proba bat Tolosan, baina printzipioz baikor da. Ezkurdia-Merino II izango dituzte etsai txapelketari hasiera emango dion lehian.
Asperen zortzikotea Altuna III-Barriola, Ezkurdia-Merino II eta denen ahotan izan den Irribarria-Rezustak osatuko dute. Aimar Olaizola oso garbia izan da eta bikote hau gehitxo izan ote daitekeen plazaratu du mikroen aurrean.