Michael Fakuade hegal-pibota fitxatu du Gipuzkoa Basketek

Gipuzkoa Basket taldeak barneko jokoa indartu du Michael Fakuade hegal-pibotaren fitxaketarekin. Nigeriako pasaportea duen jokalari estatubatuarra Urrezko LEB mailako Cafés Candelas Breogán taldetik dator eta urtebeterako kontratua sinatu du, talde gipuzkoarrak jakinarazi duenez.

Talde gipuzkoarraren eskutik Endesa ligan lehen esperientzia izango du Fakuade hegal-pibotak. Gipuzkoa Basketen arabera, datozen egunotan hasiko da taldekide berriekin lan egiten.

Fakuadek 2.01 metroko garaiera eta 27 urte ditu, eta iaz denboraldi polita egin zuen Urrezko LEB mailan; hain zuzen, 10.1 puntuko, 6.9 erreboteko eta 1.5 asistentziako batez bestekoak lortu zituen partidako, 23.14 minutuan 13.3 puntuko balorazioa izateko.