Pertsona gorrentzako eginiko lehenengo euskal musukoa Samatzen sortu dute
«Ene web atarian ezarri nuenetik, hiru eguneko epean jadaneko milioi bat maskaren eskaera jaso dut, aitortu du Delphine Lumale artista plastikoak. Baxe Nafarroako Samatze herrian kokaturiko Where the Daffodils grow izeneko enpresaren sortzaile, bera bakarrik arduratzen da gorrak diren pertsonentzako sorturiko «lehenengo euskal maskaren» eskaerak kudeatzeaz. Diseinutik hasi eta fabrikaziora bitartean Beethoven izenarekin batailatu duten musukoa «%100ean euskal ekoizpena izanen da».
Egun batez, Vichy hiriko kafe-saltzaile baten deia jaso zuen. «Estatubatuar batek aho aldean gardena den maska bat sortu zuela entzuna zuen eta bere kafetegian bezero gor bat zuenez, maska bat sor nezakeen galdegin zidan», azaldu du Delphine Lumalek.
Beraz, arnasketa galaraziko ez zuen plastikozko maskara batean pentsatzeari ekin zion. «Gisako maska bilatzen zuen Carole Boute ortofonistaren artikulu bat irakurri nuen. Harremanetan jarri nintzen berarekin, ene prototipo guziekin entsegua egin eta bere iritzia eman zidan», gehitu du.
«Ene web atarian ezarri nuenetik, hiru eguneko epean jadaneko milioi bat maskaren eskaera jaso dut” aitortu du Delphine Lumale artista plastikoak. Baxe Nafarroako Samatze herrian kokaturiko Where the Daffodils grow enpresaren sortzaileak kazeta.eus atarian azaldu du bere ibilbidea.
«Prototipoak ekoitzi eta ehungintza zein pintura produktuak egiten ditut profesional eta norbanakoentzat. Otsailetik goiti, Italian izan ziren Covid-19 kasuek hunkitu ninduten. Ene lehen oihalezko maska otsailaren 25ean egin nuen eta ondotik, dena arrunt fite pasa da», azaldu du.
Ofizialeen eta Artisauen Ganbaran izena eman zuen bere lehen maskak merkaturatu ahal izateko. Begirik bildu gabe gauak eman zituen AFNOR eta DGAren (Armadaren Zuzendaritza Nagusia) arauak beteko lituzkeen prototipoa diseinatzeko. «Oihala irazkorra izan behar da, baina baita arnasteko modukoa», zehaztu du.
Entzumen arazoak dituztenak lehentasunez
DGA froga arrakastaz gainditu zuen azken bertsioa agorrilaren 24an balioetsi zuen Carole Boutek. Euskal Herrian lehen aldikoz diseinatu eta ekoizturiko leihatila-maskak Beethoven hartu du izena. «Carole Boutek eskuratu zuen lehen alea!», dio enpresariak.
Oraingoz, maska ez da salgai baina garbiketarako erresistentzia frogak gainditu dituenez, aitzin eskaerak abian dira. Abiadura bizian heldu dira demandak. «Ortofonistek, botikariek edota irakasleek gisako maska nahi dute. Baina lehenik gorrak diren edo entzumen arazoak dituzten pertsonei eman nahi diet lehentasuna».
Delphine Lumalek ekoizpenerako arduradun bat hautatu du eta bezero profesionalentzat ekoizpenarekin hasi behar luke ondoko bi asteetan. «Maskak Frantziako ESATen eginen dira». Norbanakoentzat Samatzeko tailerretan jarraituko du Beethoven izeneko maska ekoizten eta web atariaren bidez eskatu ahalko dira.
«Egia da eskaera kopuruarekin harriturik naizela, baina arrunt uros naiz %100 euskal produktua dela erakusteaz!», azaldu du.