Boonie hartzen abentura berriak

XIONG CHU MEI BAN WO XIONG XIN (BOONIE BEARS: CÓDIGO GUARDIÁN)
Txina, 2023. 96’. Zuzendaria: Yongchang Lin, Heqi Shao. Gidoia: Tachi Cui, Zhenjie Liu, Rachel Xu.

Txinan ekoiztutako telesail animatua da ‘Boonie Bears’; ‘Boonie Bears: Código Guardián’, telesail horretatik jaiotzen den bederatzigarren filma da. Izenburu horietako batzuk euskaraz topa ditzakezue Makusi plataforman.

Protagonista nagusiak bi hartz dira: Briar eta Bramble. Abentura berri honetan denboran atzera egingo du jauzi istorioak eta amarekin batera bizi ziren garai zoriontsua ezagutuko dugu. Sute batek ingurua suntsitzen duenean, ordea, guztia aldatu egingo da betiko.

Filmean familiaren balioak nabarmentzen dira, hala nola amaren eta seme-alaben arteko maitasuna eta anai-arreben arteko lotura.

Txinan 2023ko urtarrilaren 22an (Txinako Urte Berrian) estreinatu zen eta otsailaren 5erako, jada 200 milioi dolar baino gehiagoko irabaziak izan zituen; frankiziaren film arrakastatsuena izaten ari da. Martxoaren 14an iritsiko da Hego Euskal Herriko zinema aretoetara.