Maddi Barrokal, Ados Pilotaren Lau eta Erdiko txapeldun

Bergararrak erakustaldia emanda 22-5 menderatu du Leyre Oskoz Azkoitian jokatutako finalean.

Maddi Barrokal da Ados Pilotaren Lau eta Erdiko lehen txapelduna, Azkoitiako Gurea pilotalekuan jokatu den final handian Leyre Oskoz 22-5 menderatu ostean. Partidak hasieratik izan du kolore gorria eta Barrokalek garaipen garbia eskuratu du.

Bergararrak sekulako erakustaldia eman du: sakearekin asko asmatuz, tantoak amaitzen ere bikain eta defentsan oso sendo. Leyre, aldiz, finalerdietan erakutsi zuen mailatik oso behera ibili da eta amore eman behar izan du Maddi handi batean aurrean.

Pena izan da, giro bikaina egon delako Gurea pilotalekuko harmailetan eta, gaur ez bezala, txapelketak iraun duen bi hilabeteetan partida onak ikusi direlako.

Maddik eskaintza berezia egin nahi izan dio duela gutxi hil zen Naroa Elizalde Etxekoloneari.