Iñaki Mariskurrena, Itziar Barruetabeña eta Eire Blanco
Egogaineko LABeko kideak

«Orain Gipuzkoa», orain Egogain!

EAJk gizarteari eslogan eta irudi politekin saltzen digun ereduar­en atzean, «pertsona helburu» duen horretan, zaurgarritasun egoeran egon gaitezkeen edonor prekaritaterantz garamatza.

EAJk agintzen duen Gipuzkoako Foru Aldundiak kanpora begira eman nahi duen irudia honako hau da: modernoa, garai berrietara egokitua, lurralde aurreratua, berdintasunarekin inplikatua, kontziliazioaren aldekoa, pertsona helburu... Bide horretan badu zer egin, ordea! Errealitatea deskribatzetik oso urrun dauden hitzak baitira. GFAk kudeatzen duen Egogaineko nagusien egoitza da honen adibide.

Egogain Eibarren kokatzen den egoitza da, eta bertan pertsona nagusiak, mendekotasun handia, adimen urritasuna eta gaixotasun mentalak dituzten pertsonak artatzen ditugu, guk zaindu eta maitatu egiten ditugu, gehienek hemen egingo baitituzte beren bizitzako azken urteak, behar duten bizi duina eta merezi duten kalitatezko arreta izan dezaten lanean dihardugu.

Aldundiaren azken urteetako jarrerarekin (Elena Basagoitik egindako adierazpenak horren adibide), Aldundiak pribatizazio eta prekaritateranzko norabidea hartu du, zeinak, bertan lan egiten dugunon lan baldintzak kaltetuz, instituzionalizaturik dauden pertsonarik zaurgarrienek merezi duten arretaren kalitatea erasaten duen.

Honen adibide dira langileriaren etengabeko aldaketak, ratio desegokiak, lanpostuen desagerpenak, amortizazioak, Clece azpikontratetako gaueko lankideei egiten zaien jazarpena (etengabe zigorrak ezarriz eta abar) eta baldintza prekarioak edo instalazio zaharkituak (Gureak enpresako langileek ikuztegian jasan dituzten tenperatura altuengatik berriki salatu dugun egoera), besteak beste.

Testuinguru honetan, berriki irekiko den Unitate Psikogeriatrikoan (8. solairuan) gauden langile kopuru berdinarekin irekitzeko asmoa agertu dute, langileoi inongo informaziorik eman gabe eta beldurrezko mezuak zabalduz.

Berdintasunari dagokionez, Egogaineko langileriaren kolektiboa osatzen dugun gehiengoa emakumezkoa izanik, Aldundiak arlo honetan zabalduriko mezuak propaganda hutsa direla iruditzen zaigu: batetik, Aldundiak berdintasunaren aldeko apustua egiten ari dela saltzen dio gizarteari; komunikabideetatik alegia, baina bestetik, Aldundiko langile garen eta Egogainen lan egiten dugun emakumeok egoera honen guztiaren jomugan jartzen gaitu. Berdintasunaren mesedetan hedabideetan zabaldutako hitz horiek guztiak gezur hutsa besterik ez direla deritzogu. Kalean uso, etxean otso!

Honen adibide garbia da haurren zaintzagatik lanaldi murrizketa metatuak ukatu izana. Eta, era berean, gure kategoria profesionala «Erizain Laguntzaile» izatetik «Zaintzaile» izendapena izatera aldatzea.

Hau da, gure lana gutxietsi eta desprofesionalizatu egin du Aldundiak. Erizain Laguntzailearen funtzioak bete eta «Zaintzaile» izendapena jarriz. Gipuzkoako Foru Aldundiak ez bezala, Bizkaiko eta Arabako aldundiek, «Erizain Laguntzaile» kategoria aitortzen diete langileei guk egiten dugun lan berdina egiteagatik. Aldundia egoera honen jakitun da aspalditik, baina eskaera historikoa den honi muzin egiten dio. Dagokigun izendapenaren onartzeak egindako lanaren aitortza eta etorkizunerako garapen profesionalaren bermatzea ekarriko liguke. Kalitatezko zerbitzuaren mesederako.

Aurreko paragrafoan aipatutako honek, «Kabia»-ri ematen ari zaion ereduak eta gure etorkizun profesionalarekiko ezjakintasunak garrantzi handia du, Aldundiko langile izandako oso profesionalak diren lankideen joatea eragin duelako eta Egogain azpikontraten negozio eta paradisu bilakatzea ahalbidetzen duelako.

EAJk gizarteari eslogan eta irudi politekin saltzen digun ereduar­en atzean, «pertsona helburu» duen horretan, zaurgarritasun egoeran egon gaitezkeen edonor prekaritaterantz garamatza. LABen iritziz aurreko gai hauei irtenbidea eman behar zaie, zerbitzu publikoak garatuz, langileon baldintzak hobetuz eta pertsona zaurgarrienen kalitatezko arreta integrala bermatzeko. Guztiok zerbitzu hauen erabiltzaile izan gaitezke eta. Horregatik, LABetik gizarte eragile, langileria eta erabiltzaile diren senideei hastear dauden ekimenetan inplikatzea eskatzen diegu.

«Orain pertsonak», orain Egogain!

Buscar