Urtarrilaren 15ean, ezohiko osoko bilkuran egungo Udaltzaingoaren Zerbitzua Udaltzain Kidego bihurtzeko aukera eztabaidatuko da, UPNk eta PPk proposatuta. EH Bildu Uharte taldeak herritarrei azaldu nahi die zergatik ez dugun proposamen horrekin bat egiten eta zergatik iruditzen zaigun beharrezkoa herriarentzat ondorio garrantzitsuak dituen erabaki baten inguruan kolektiboki hausnartzea.

Ez da izen aldaketa soil bat. Udaltzain Kidego bat sortzeak herri ereduan, antolakuntzan eta arlo ekonomikoan inplikazio garrantzitsuak izango lituzke. Gertuko herrietako esperientziak aztertu ostean, ondoriozta dezakegu aldaketak ez lukeela zerbitzua hobetuko; aldiz, gastu publiko handiagoa eragitearekin batera, beste zerbitzu batzuekiko soldata-arrakala zabaldu eta herritarrekiko hurbiltasun-galera posible bat eragingo luke. Gainera, batetik, beharrezkoa izango litzateke agenteek orain arte egindako zerbitzu ez-polizialak indartzea eta, bestetik, aldaketak suzko armak eskuratu eta erabiltzearen inguruko eztabaida irekiko luke.

Uhartek ez du udaltzaingoa sortzeko legezko betebeharrik.2018ko Poliziei buruzko Foru Legeak baimentzen du, baina ez du derrigortzen. Herritarrek, gainera, ez dute segurtasun-gabeziarik sumatzen: aguazilen zerbitzua da zainketei buruzko prozesu parte-hartzailean ondoen baloratua eta 60 urtetik gorako pertsonen %73 pozik edo oso gustura daude segurtasunarekin. Soilik %4k adierazi du ez daudela oso gustura. Udal hau bat dator Polizia zerbitzuaren lanaren balorazio oso positiboarekin. Alkatetzaren urte hauetan, EH Bildu Uhartek polizia zerbitzua balioan jarri du eta zerbitzu horren garrantziaz jabetuta, agente gehiago, prestakuntza gehiago, baliabide material gehiago eta flota berritu dugu. Hobekuntza horiek aurrekontua handitzea ekarri dute eta egun 600.000 euro ingurukoa da urtero.

Komeni da gogoraraztea Uhartek gertuko herrietako polizien kolaborazio puntualak eta herriaren beharrei etengabe erantzuten dien Foruzaingoaren etengabeko laguntza dituela. Ikuspegi ekonomikotik, aldaketa horrek urtean 80.000 euroko gainkostua ekarriko luke hasieran, ordutegirik zabaldu gabe eta gaueko zerbitzua bete gabe. Esperientziak erakusten duenez, epe ertainean, kidego horiek gaueko txandak ezarri ohi dituzte, eta horrek gastua 1.000.000 euroraino igo lezake urtean.

Milioi hori, gutxi gorabehera, Uharte eta Esteribarko Gizarte Zerbitzuen Mankomunitatearen aurrekontuaren parekoa da, biztanleria xahugarriari, familiei, haurrei, menpekotasunari eta gizarte bazterketari arreta ematen diena. Gure ustez, baliabide horiek zainketak indartzeko erabili beharko lirateke, Etxez Etxeko Arreta Zerbitzua edo Eguneko Zentro publiko bat sortzeko, eta ez poliziaren gastua handitzeko.

EH Bilduk Alkatetza duen arren, Udalak 13 zinegotzi ditu, EH Bilduk 5 eta proposamenaren sustatzaileek 4. Osoko bilkuran jarrera hori defendatuko dugu, eta segurtasun-eredu hurbil, prebentibo eta koordinatuarekin dugun konpromisoa berretsirik, herritarren ongizatea eta benetako beharrak erdigunean jarriko dituena.

Arestian aipatutako guztia aintzat hartuta, EH Bildu Uhartek galdera hau egiten dio bere buruari: beharrezkoa al da dagoeneko funtzionatzen duen zerbait aldatzea? Bidezkoa al da gastu horri lehentasuna ematea, premia sozial handiagoen aurrean? Gure ustez, argi eta garbi, ez.


Zuen iritzi artikulu edo gutuna iritzia@gara.net helbidera bidal dezakezue, word formatuan edo beste formatu editagarri batean. Idatzian sinatzailearen izena, abizenak, telefonoa eta NAN zenbakia agertu behar dira. Iritzi artikuluak eta gutunak sinatzailearen izen-abizenekin argitaratuko dira. Egileak talde baten izenean sinatzen badu, sinatzailearen izenaren azpian taldearen izena agertuko da. NAIZ ez da iritzia sailean argitaratutako edukiez arduratzen.