2012. urtea: Eusko Jaurlaritzak, Patxi López buru zuela, eten zuen 2010. urtean irakaskuntzako sindikatuekin sinatutako lan-akordioa, non irakasleen erretiro aurreratuei lehentasuna ematen zien. EAJk boterea berreskuratuz gero, etenaldia kentzeko konpromisoa hartu zuen (euskaldun hitza).

Urte bereko abenduan Iñigo Urkullu izendatu zuten lehendakari. Etenaldia kendu al zen? Ez, horixe (euskaldun hitza)!

2017. urtea: Eusko Legebiltzarrak etendura kentzearen aldeko Legez Besteko Proposamena onartu zuen. EAJk ez zuen jaramonik egin, eta gaia judizializatzeko aholkatu zuen, auzitegien epaia onartuko baitzuen (euskaldun hitza).

Bien bitartean, PSE k esan zuen, etenaldia kentzearen alde egon arren, ezin zuela ezer egin, EAJrekiko gobernu-akordioak galarazten zion eta.

2019. urtea: Eusko Legebiltzarrak Lege-Proposamen bat onartu zuen, lan-akordioaren etendura kentzeko. EAJk atzeratu egin zuen bere tramitazioa batzordean, legealdia amaitu arte (euskaldun hitza).

2022. urtea: 201/2022 epaia, etenaldia kentzearen aldekoa. EAJk, epaia onartu beharrean, errekurritu egin zuen (euskaldun hitza). Kontua sub judice dago.

Egunkarietan irakurtzen dudanean Imanol Pradalesek Madrilgo Gobernuari bere konpromisoak betetzeko eskatzen diola, ezin dut irribarre ironiko bat erreprimitu.


Zuen iritzi artikulu edo gutuna iritzia@gara.net helbidera bidal dezakezue, word formatuan edo beste formatu editagarri batean. Idatzian sinatzailearen izena, abizenak, telefonoa eta NAN zenbakia agertu behar dira. Iritzi artikuluak eta gutunak sinatzailearen izen-abizenekin argitaratuko dira. Egileak talde baten izenean sinatzen badu, sinatzailearen izenaren azpian taldearen izena agertuko da. NAIZ ez da iritzia sailean argitaratutako edukiez arduratzen.