Eusko Label, Euskotren ligak eta «Boga» aldizkaria
Xabier Castrillon Revuelta | Donamaria
13/09/2018

TKE (Traineruen Kluben Elkartea) liga, gaur egun Eusko Label liga izenez ezagutzen duguna, 2003. urtean abiatu zenean, Autonomia Erkidegoek (Euskadi, Galizia eta Kantabria) diru laguntzak eman zituzten, baita 2004. urtean ere. Eusko Jaurlaritzak jarri zuen diru kopuru handiena

2009. urtean, emakumeen ligaren hasiera izan zen, eta Euskotren liga izenarekin ezagutzen dugu; orain arte, Eusko Jaurlaritzaren diruari esker jarraitu du bizirik. Aurten, 12 talde lehiatu dira liga horretan sartzeko, eta lau talde euskaldun sartu dira.

2017. urtean Arantxa Tapia Ekonomiaren Garapenerako sailburuak eta Borja Rodrigo TKEko buruak lau urterako akordioa sinatu zuten. Horren bidez, Eusko Jaurlairtza ligako babesle nagusia izatea adostu zuten, Eusko Label markarekin.

Aipatutako laguntza horietatik aparte, Eusko jaurlairtzak bost ikurrinen sariak ordaindu zituen, 2012tik 2016ra, hau da: Eusko Label bandera (Zarautzen) eta lau Euskadi-Basque Country ikurrin, bi Bartzelonan eta bana Malagan eta Sevillan.

TKEko egitura orokorra eta arrauna, gaur egun ezagutzen ditugun bezala, bideraezinak lirateke euskal erakunde publikoen ekarpen ekonomikorik gabe. Kontuan izan behar dugu, halaber, Foru Aldundiek eta zenbait udalek beren herrietan estropadak antolatu ahal izateko ematen duten dirua (Bilbo, Donostia, Getxo, Hondarribia, Ondarroa, Orio, Portugalete, Sestao, Santurtzi, Pasai Donibane, Pasai San Pedro, Zarautz eta Zierbena).

Bestetik, kontuan izan behar dugu EITBk gure kirol hau zabaltzeko, arraun taldeek babesle pribatuak erakartzeko eta gure hizkuntza babesteko egiten duen lana.

Baina zer gertatzen da TKEren "Boga" aldizkari ofizialarekin? (Luxuzko 106 orrialde ditu eta dohainik banatzen da).

Bada... informazio guzti-guztia gaztelaniaz dagoela. Bost editorial: Borja Rodrigo TKEko presidentearena, maialen Chourraut piraguista eta txapeldun olinpikoarena, Andrea Oubinha San Juan-Batelerak taldeko arraunlariarena, Alfonso Herran "As" egunkariko kazietariarena eta Juan Pedro Badiola Euskadiko eta Kantabriako CaixaBank taldeko zuzendariarena; baita ligari buruzko informazio orokorra eta estropadak antolatzen dituzten herrien zenbait datu historiko nahiz gaur egungoak ere. Iragarki eta publizitate gehienak ere gaztelania hutsez egoten dira, eta, euskaraz, lagin batzuk besterik ez: sailkapena, arraunlaria, entrenatzailea eta horrelakoak.

Hori ez al da arraunlari eta arraunzale euskaldun guztiei trufa egitea? Erakunde publikoen hitzkuntza politikaren ardura duzuen agintariak zeren zain zaudete TKEko arduradunei gogorarazteko Basque Country herrialdean bizi direla eta euskal kirola sustatzeaz gain denon helburua euskara hedatzea dela? Izan ere, arduradun horiek, nabarmen, arduragabekeriaz, utzikeriaz edo alferkeriaz mespretxatzen dute euskararen ofizialtasuna; ez dute aitortzen herritarrei informazioa euskaraz jasotzeko eskubidea, euskararen kaltetan, eta eskuragarriago eta erakargarriago den erdara bultzatzen dute, euskararen prestigio kaltetan.

Oharrak:

Eremu euskaldunetan antolatutako edozein estropadatan, honela irakur dezakezue Eusko Label ligako eta beste ligako antolakuntzako pertsonek eramaten dituzten elastikoetan eta txalekoetan: Juez, Organización, Staff...

Gure txantxangorria TKEko Official Partners ere bada, baina "Boga" aldizkarian hegoak ebaki dizkiote!

Artículos
Iñaki Egaña
17/11/2018
Iñigo Jaca Arrizabalaga
17/11/2018
Víctor Moreno
16/11/2018
Jasone Agirre Garitaonandia
16/11/2018
Cartas
Martxelo Alvarez
17/11/2018
Joseba Ortega Jungitu | Bilbo
16/11/2018
Ione San Ildefonso, Joseba Alvarez eta Maialen Begiristain | Eleak-Libre mugimendua
16/11/2018
Pedro Mari Usandizaga Añorga | Ondarroa
16/11/2018
Últimos posts
Jonathan Martínez
16/11/2018
Martin Garitano
14/11/2018
Jonathan Martínez
14/11/2018
Josean Bueno
13/11/2018