Navarra Suma eta Nafarroako Adminsitrazio Auzitegia, lanpostu elebidunen kontra
Fermin Zabaltza Aleman | Administrazioan Euskaraz Taldea
13/08/2020

Nafarroako Administrazio Auzitegiak izaera elebiduna kendu zien Antsoaingo eta Berriozarko idazkari lanpostuei, uztailean prentsak iragarri zuenez.

Garai bertsuan, Eguesibarko Udalak ere, Navarra Suma boterean zela, izaera elebiduna kendu zien Udaleko lanpostu elebidun gehienei. Lanpostuak eskuratzeko aukera berdintasuna defendatzeagatik egin omen du hori. Hala, herritar euskaldunak izanen dira tratuan aukera berdintasuna izanen ez dutenak.

Ikusten denez, Navarra Sumak lortzen ez duenean, Navarra Sumaren fronte judizialak lortzen du euskara baztertzea (kasu honetan, Nafarroako Administrazio Auzitegia ez da organo judizial bat, baina haren erabakiak bete beharrekoak dira), udaleko ordezkarien borondatearen kontra eta udalen autonomiaren kontra. Gogoan hartzekoa da Euskararen Legeak, 17. artikuluan, ezartzen duela eremu mistoan udal bakoitzak erabaki dezakeela zer lanpostutarako izanen den nahitaezkoa euskaraz jakitea.