Edozein testuinguru lehiakorretan, joko batetik hasi eta hauteskunde batzuetaraino, faktore psikologikoa funtsezkoa da. Aurkaria kikiltzea gerrari buruzko tratatu klasikoek jasotzen duten teknika bat da. Horixe da, hain zuzen ere, mundu osoko ultraeskuinaren apostoluek egiten duten lanaren zati bat: fatalismoa ereitea, eskuinaren etorrera ezinbestekoa dela esatea. Horixe bera sinetsarazi zioten munduari Brasilgo hauteskundeen harira ere. Baina militanteen talde eraginkor eta diziplinatu batek egindako kanpaina bizi eta bikain bati esker, Lulak garaipena lortu du bigarren itzulian. Marco Rubiok diseinatutako AEBren esku sartzeari, tekno-oligarken algoritmoei eta establishment neoliberalak sustatutako fatalismoari aurre eginez, Lulak eta ezkerreko blokeak garaipena erdietsi dute. Inperioa eta ideologia totalitario baten aparatuak ez ezik, aberatsak ere garaitu dituzte; hain zuzen, diruzalekeriaren eta justiziaren arteko borroka hain desorekatua egiten duen kapital hori garaitu dute.

Brasil kolpismo garaikidearen laborategia izan da. Lehenik, kolpe biguna eman zuten Dilma Rousseffen aurka. Kargutik kentzeko impeachment bat behartu zuten, akusazioak faltsuak zirela frogatu zen arren. Ondoren iritsi ziren Jair Bolsonaro eta haren autoritarismo atzerakoi eta konplexugabea, eta kolpismoa doktrina bihurtu zen. Luiz Inacio Lula da Silvaren aurkako prozesuak lider herrikoia kartzelara eraman zuen. Eskubideen murrizketen eta gehiengoen aurkako politiken legegintzaldia izan zen. Lulak askatasuna berreskuratu eta hauteskundeak irabazi zituenean, Bolsonaroren aldekoek Kongresuari eta Auzitegi Gorenari eraso egin zieten 2023ko urtarrilaren 8an, trumpisten antzera. Bolsonaro zuzenbide estatuaren aurkako mota guztietako delituengatik zigortua izan da. «Bolsonarismoa» bere dinastia atzerakoia Flavio semearen bidez betikotzen saiatu da, baina Langileen Alderdiak eragotzi du, mundu osoaren mesederako.

Garaipena iradokitzailea izan da. Aurrera begira, ezkerrari geratzen zaion lana ez da samurra izango, inondik inora. Izan ere, botere desoreka hain da handia, ezen, garaipenak behar bezala ospatu eta gero, borrokari eutsi behar baitzaio.