400 lagun elkartu dira Hendaian erretreten erreformaren aurkako mobilizazioan

Erretreten erreformaren erretiratzea eskatzeko mobilizazio berria egin dute, gaur goizean, Hendaian. 400 lagunek bat egin dute LAB, CGT, Solidaires, FO eta CFE-CGC sindikatuek babesturiko martxan. Herriko Etxea eta Intzura ekonomia eremuaren artean igaro da martxan. Hiriko hiru saltoki handietan hitzartzeak egin dituzte antolatzaileek erretreten erreformaren ondorio kaltegarriak nabarmenduz. Bihar mobilizazio berria eginen dute Baionan. Donibane Garazin eta Maulen ere mobilizazio dinamikak abian eman dituzte.

Maite Ubiria|2020/01/15
Retraites_hendaia
Gaurko mobilizazioan U30eko greba deialdia zabaldu du Ipar Euskal Herriko LAB sindikatuak. (Naiz)

Azoka eguna izanik Hendaian Errepublika plazan giro berezia bazen gaur goizean. Elkartasunaren kafea hartu ondoren bertatik abiatu da intersindikalak –CGT, Solidaires, FO eta CFE-CGC– eta LAB sindikatuak bultzaturiko martxa.

SNCF tren konpainiako langileek 42. greba eguna bete dutela eta txalo artean hartu dute mobilizaziora bertaratu diren 400 bat lagunek CGTko ordezkari batek manifestazioa partitu aitzin eskainitako hitzartzean borroka luze horri eginiko aipamena.

Txaleko Horien mugimenduko kideak, gazteak, irakasleak, hautetsiak.. beste behin ere erretreten aurkako mobilizazioaren aniztasuna agerian utzi du gaur Hendaian eginiko protestak.

Herriko Etxeko plazatik atera eta merkatua zeharkatuz hiri barnean sartu da martxa goizeko 11.00ak aldera. Ibilbidea Intzurako industriagune eta komerzialean amaitu aurretik, hiru geldiune egin dituzte manifestariek hiriko hiru saltoki nagusien aurrean.

Zehazki, Carrefour Market, Intermarche eta Lidl saltokien aurrean paratu dira tarte txiki batean protestan parte hartu duten herritarrak, bertan blokeo ekimen bigunak gauzatuz.

Donibane Garazitik heldutako ordezkari batek ikastetxeetan indarra hartzen ari dela protesta nabarmendu du, era berean grebalarien asanbladak Nafarroa Behereko hiriburuan berriki martxan jarri duen mobilizazio dinamikaren berri eman du.

«Edouard Philippe lehen ministroak kolokan du bere postua»

Tren langile batek salatu du Edouard Philippe buru duen Gobernuak borroka mugimendua isiltzera jokatu duela. Hartara, azken bi asteotan Hexagonoko portu nagusietan langileek burutu dituzten blokeoek «industriaren hornikuntzan eragin handia izan dutela» agerian utzi du.

Borroka zabaltzeko unea dela gaineratu du ondoren, erreformaren aurkako mobilizazio handia lehen ministroaren egoera bera ahultzen ari dela mahaigaineratuz.

«Litekeena da Philippek laster batean bere postua galtzea eta erabaki horrek, gertatuz gero, garaipena hurbilago dugula erakutsiko luke», azaldu du, puntuen arabera erretreta sistema ezartzeko egitasmoa bertan behera uzteko mobilizazioa aregotzeko deia egin aurretik.

Bihar, Baionan mobilizazio berria izanen dela oroitarazi dute antolatzaileek protestaren bukaeran. Maulen ere zerbitzu publikoen eta eskubide sozialen defentsaren inguruan sorturiko ekimenak jende bilkura deitu du.

LAB Ipar Euskal Herriko kideek, bestalde, Hendaiako protestan parte hartu duten herritarrei hilaren 30ean deituriko greba orokorrarekin bat egiteko gomita zabaldu dute. Hego Euskal Herritik sustaturiko deialdia sostengatzeko elkarretaratzea deitu du sindikatu abertzaleak Hendaiako Herriko Etxearen aurrean.